Kollajdy jasaǵan Záýresh SMAǴUL, «EQ»
– Ár otbasynyń ańsaıtyny – sábı. О́ıtkeni dúnıege aman-saý kelgen sábı ata-anasyn kól-kósir qýanyshqa bóleıdi. Alaıda keıbir otbasynyń mundaı baqytqa bólene almaıtyn jaıy bar. Degenmen sondaı otbasylarǵa EKU tásilimen náresteli bolýǵa múmkindik jasalyp otyr. Osy oraıda jyl saıyn ekstrakorporaldy uryqtandyrý prosedýrasyna bólinetin kvota kóbeıtildi. Byltyr Atyraý oblysynda turatyn analarǵa ekstrakorporaldy uryqtandyrý (EKU) úshin «Ańsaǵan sábı» baǵdarlamasymen 232 kvota bólingen edi. Bul kvota tolyq ıgerildi. Al bıyl atalǵan jobamen sábı súıýdi ańsaǵan analarǵa 233 kvota beriledi. Sebebi óńirde bedeýlik dıagnozy bar áıelder sany azaıar emes. Qazir osyndaı 840 áıel tirkeýde tur, – deıdi reprodýktolog-dáriger Gúlnar Esqaıyrova.
«Ańsaǵan sábı» baǵdarlamasymen tuńǵyshyn ómirge ákelgen analardyń qatarynda 52 jastaǵy Aıgúl Bısenbaeva da bar. Qazir ol Jylyoı aýdanynyń ortalyǵy – Qulsary qalasynda turady.
– Atyraý qalasyna taıaý ornalasqan Tomarly aýylynda dúnıege kelgen edim. О́zim – egizdiń syńarymyn. Keıin 90-jyldary Qulsary qalasyna qonys aýdardym. Kúıeýim Ibragımmen eki jyl buryn tanysyp, ekeýmiz otbasyn qurýǵa bel baıladyq. Onyń burynǵy otbasynan uly men qyzy, nemere-jıenderi bar. Bárimiz bir shańyraqta tatý turamyz, – deıdi Aıgúl Bısenbaeva.
Onyń negizgi mamandyǵy – aspaz. «Mańǵystaý Servıs Kompanı» JShS-de jumys istegen. Júktiligine baılanysty jumysynan shyǵyp ketken.
– Turmysqa shyqqan soń balaly bolýdy oılana bastadym. О́ıtkeni otbasynyń baqyty – bala tárbıeleý. Biraq «bul meniń jasymda múmkin be?» degen kúdigim bolǵanyn jasyrmaımyn. Sol sebepten qulsarylyq dárigerler Rýslan Ákenov pen Nurshat Qalıeva, Atyraýdaǵy gınekolog Gúlsara Basarovanyń keńesine júgindim. Dárigerlerdiń keńesimen EKU arqyly bala kóterdim. Oblystyq perınataldyq ortalyqtyń bilikti dárigeri Dınara Maratqyzy ota jasady. Bári sátti bolyp, ómirge deni saý ul ákeldim. Esimin Nurgeldi dep qoıdyq, – deıdi Aıgúl Bısenbaeva.
Atyraý oblysy
