Qazaqstandyq jankúıerler frıstaılshy Iýlııa Galyshevanyń jarys jolyna shyǵýyn taǵatsyzdana kútip, konkımen júgirýshi Nadejda Morozovanyń da jolyna sondaı úlken úmitpen qarady. Sebebi otandasymyz birer kún buryn 3000 metr qashyqtyqta 30 sportshynyń ishinde 13-orynǵa turaqtap, básekeden keıin BAQ ókilderine bergen suhbatynda bar kúshin 1500 metr qashyqtyqtaǵy jarysqa salatynyn jáne mindetti túrde bir júlde bolatynyn aıtqan. «Budan da jaqsy, budan da jyldam nátıje kórsetkim keledi. Endi bar kúshimdi 1500 metr qashyqtyqtaǵy jarysqa salamyn. Beıjińdegi muz aıdyny biz úshin yńǵaıly. Qazaqstanǵa medal ákeletinime 100 paıyz senimdimin», dedi Nadejda Morozova jarystan keıin.
Nadejdanyń bulaı senimdi sóıleýine de negiz bar edi. О́ıtkeni 1500 metr – onyń oń jambasyna keletin qashyqtyq. Máselen, ol byltyr qarasha aıynda Álem kýbogi jarysynyń Polshadaǵy kezeńinde 1500 metrdi 01:56.92 ýaqytta baǵyndyryp, úzdik úshtiktiń qatarynan kórindi. Birinshi jáne ekinshi oryn alǵan japonııalyq Mıho Takagı men Aqsh ókili Boýı Brıttanı bul qashyqtyqty 01:56.00 jáne 01:56.60 ýaqyt kórsetkishimen basyp ótken bolatyn.
Morozova keshegi básekede joǵarydaǵy nátıjesin sál jaqsartqanymen, úzdik úshtik bylaı tursyn, TOP-10 sportshynyń qatarynan da kórine almady. Beıjińdegi «Ulttyq konkımen júgirý» sport kesheninde ótken jarysta Nadejda Morozova 01:56.85 ýaqyt kórsetkishimen 14-orynǵa turaqtady. Al tý ustaýshy Ekaterına Aıdova bul qashyqtyqty 1:59.01 ýaqytta júrip ótip, jarysty 18-orynmen aıaqtady.
1500 metr qashyqtyqqa jarysýda Olımpıada rekordyn jańartqan Nıderland ókili Iren Vıýst top jardy. Onyń ýaqyt kórsetkishi – 1:53.28. Bul – onyń Olımpııa oıyndaryndaǵy altynshy altyn medali. Al 1500 metrdegi úshinshi bas júldesi. Kúmis júldeni japonııalyq Mıha Takagı (1:53.72) ıelense, úzdik úshtikti taǵy bir Nıderland sportshysy Antýanette de Iong (1:54.82) túıindedi.
Bıatlonshylardyń jekeleı básekesinde el namysyn qorǵaǵan Galına Vıshnevskaıa-Sheporenko úzdikter qatarynan kórine almady. Jerlesimiz 15 shaqyrymdyq jarystyń tórt oq atý sátinde bir ǵana qatelik jiberse de, jalpy esepte nebári 44-orynnan kórindi. Bir aıta keterligi, Galına Vıshnevskaıa bıylǵy bıatlon maýsymynda nysana kózdeýden táýir nátıje kórsetip keledi. Alaıda onyń jyldamdyǵy ózge sportshylardan kemshin túsip jatyr. Eger aldaǵy ýaqytta jyldamdyǵyn arttyrýǵa jumys istese, Álem kýbogi jarystarynda joǵary oryndardan kórinýi ábden múmkin.
Galına jekeleı jarystyń jeńimpazy, Sochı Olımpıadasynyń estafetadaǵy chempıony germanııalyq Denız Herrmannan 5 mınýt 04 sekýnd qalyp qoıdy. Herrman da oq atý sátinde bir márte qatelesti. Fransııalyq Anaıs Shevale-Býshe kúmispen kúptelse, norvegııalyq Marte Olsbıý-Roıselann qola júldeger atandy.
Shańǵy qossaıysynan ekinshi resmı jattyǵýynyń úshinshi kezeńine qatysqan Shyńǵys Rakparov 87,5 metrge sekirip, nátıjesin birshama jaqsartyp aldy. Munyń aldyndaǵy jattyǵýlarda ol 68 jáne 87 metrge sekirgen edi. Bir aıta keterligi, Shyńǵys Rakparov Qazaqstan quramasy úshin shańǵy qossaıysynan tarıhı joldamany jeńip alǵan bolatyn. Buǵan deıingi Olımpııa oıyndarynda birde-bir otandasymyz bul sport túrinen synǵa túspegen edi.
Sonymen qatar besinshi jarys kúninde shańǵydan Qazaqstannyń erler jáne áıelder quramasy irikteý saıystaryna qatysyp, alǵashqy 30 sportshynyń qataryna ilige almaı, jankúıerler aldynda uıatty boldy. Erler arasyndaǵy jarysty Evgenıı Velıchko 62-shi, Vıtalıı Pýhkalo 66-shy orynmen aıaqtady.
Áıelder básekesinde qazaqstandyqtar sapynan eń joǵary nátıjeni Nadejda Stepashkına tirkedi. Ol jarysty 51-shi bolyp aıaqtady. Al Angelına Shýryga – 60, Ksenııa Shalygına – 67 jáne Irına Bykova 68-shi satyǵa turaqtady. Jarys erejesi boıynsha básekeniń shırek fınalyna máreni alǵash bolyp kesken 30 sportshy joldama alady.
Erler arasyndaǵy bıatlonnan 20 shaqyrymdyq jekeleı jarysta da jerlestermiz úzdik nátıjesimen kózge túse almady. 29 jastaǵy Vladıslav Kıreev tórt oq atý aılaǵynda birde-bir qatelikke boı aldyrmasa da, jyldamdyǵynyń nasharlyǵyna baılanysty máre syzyǵyn 25-shi bolyp kesti. Ol jarys jeńimpazy fransııalyq Fııon Maıeden 3 mınýt 41 sekýndqa qalyp qoıdy. Al Aleksandr Mýhın oq atý sátinde tórt ret qatelesip, márege 52-shi bolyp jetti.
Bul jarysta fransııalyq Fııon Maıeniń baǵy jandy. Ol 20 shaqyrymdy 48:47 ýaqytta baǵyndyryp, Olımpıada chempıony atandy. Belarýs ókili Anton Smolskıı ekinshi orynǵa taban tiredi. Úshinshi satyǵa eki dúrkin Olımpıada chempıony norvegııalyq Iohannes Tınnes Be jaıǵasty.
