Katonqaraǵaı memlekettik Ulttyq tabıǵı parkiniń qyzmetkerleri jylda túz tuıaqtylaryna qosymsha azyq daıyndap, soqpaqtaryndaǵy qardy atpen jaryp, jol salady. О́zen-kóldiń muzyn oıyp, aerasııa jumystarymen aınalysady. Aerasııa dep otyrǵanymyz, sýdy aýamen qanyqtyrý prosesi. Tabıǵat janashyrlary ár jerden muzdy oıyp júrgenderi sondyqtan.
– Jyldaǵydaı aıaz joq. Muz juqa. Biraq qar qalyń tústi. Qardyń qalyńdyǵy keıbir jerlerde bir metrden astam. Muzdyń qalyńdyǵy 60 sm. Mamandar muzdy burǵylap, sýǵa ottegi jiberdi. Balyqtardyń qyrylyp qalmaýy úshin mundaı jumystar jylda isteledi, – deıdi janýarlar álemin qorǵaý jáne óndirý bóliminiń saıatker-bıology Ajar Maılhanova.
Sonymen qatar bıotehnıkalyq, ıaǵnı ańdardy azyqtandyrý jumystary júrgizildi. Janýarlardy qorǵaýshy mamandardyń pikirinshe, tuıaqtylardyń qyrylyp qalmaýy úshin qosymsha azyqtandyrý jumystary qystaı júrgizilýge tıis. Júıeli júrgizilgen jumystardyń nátıjesinde Ulttyq park aýmaǵynda ań sany kóbeıgen. Ańdar shoǵyryn ábden bilip alǵan ınspektorlar sol mańǵa jazdyń kúni daıyndaǵan shópterin shashyp, naýaǵa jem salady. Ashylap qalmasyn dep, tuzdaryn qoıady. Kádimgi úıdiń malyn kútkendeı jantalasady olar. Sondaıda brakonerlerdiń tirligi «áttegen-aı» degizer edi. Abyroı bolǵanda, Katonqaraǵaı Ulttyq parkiniń aýmaǵynda zańsyz ań aýlaǵandar kezdesken joq. Ol daǵy ınspektorlardyń qyraǵylyǵy, tabıǵatqa degen shynaıy janashyrlyǵy dep oılaımyz.
Aqpan qysqa aı bolǵanymen, qytymyr. Úskirik aıazy da, boran-shashyny da bar. Osyny oılaǵan park basshylyǵy men qyzmetkerleri aqpanda ańdardyń kútimine erekshe kóńil bóledi.
Shyǵys Qazaqstan oblysy,
Katonqaraǵaı aýdany
