«Analar úıi» ashyldy

Ol mesenat mereıli isin jalǵastyra bermek

Jesirin jatqa bermegen, jetimin jylatpaǵan qazaqy qasıet búgingideı qatygezdigi basymdaý qoǵamda kerek-aq. Osyndaı ımandylyq qadamdaryna kásipkerlerdiń uıytqy bolýy da qýantady. Jaqynda Aqtóbe oblysy kásipkerleri aımaqtyq keńesiniń tóraǵasy, «Altyn qyran» JShS dırektory Islambek Saljanov iri kompanııalar basshylarymen, kásipkerlermen kezdesý barysynda «Analar úıi» áleýmettik jobasynyń tusaýyn kesti. Onyń bastamashysy – belgili bıznesmen Aıdyn Rahymbaev. «Analar úıi» áleýmettik jobasynyń negizgi maqsaty – áleýmettik jetimdiktiń aldyn alý bolyp tabylady. – Osy jobany júzege asyrý arqyly elimizde jetimder sanyn azaıtýdy kóz­deımiz, – dep atap ótti Islambek Tóleýbaıuly. Onyń aıtýynsha, qazirdiń ózinde elimizdiń aımaqtarynda jas analarǵa arnalǵan 23 ortalyq jumys isteıdi. Respýblıka boıynsha osyndaı 58 ortalyq ashý maqsat etilgen. Olarda belgili bir sebeptermen jas sábılerinen bas tartýdy sheshken áıelder ýaqytsha tura alady. Qazaqstandyq kásipkerler taǵdyr aýyrtpalyǵyn arqalaǵan osyndaı analarǵa qoldaý kórsetýge umtylýda. Ol úshin ár oblys ortalyǵynda kottedjder jalǵa alynady, olarǵa tek baspana men tamaq qana berilip qoımaıdy, basyna is túsken áıelderge psıhologııalyq kómek kórsetiledi. Qordyń birden bir qamqorshysy Islambek Saljanovtyń ózi bolyp tabylady. Mesenat elimizdiń batys óńirinde osyndaı ortalyqtar ashýǵa jáne joba bas­tamashysyna kómektesýge ynta bil­dirip otyr. Aqtóbede 10 anaǵa shaqtalǵan ortalyq ústimizdegi jyldyń 1 aqpanynan bastap jumys isteýde. Mekemeniń shyǵynyn mesenat kásipker óz moınyna alǵan. Munda qazir bes jas ana turyp jatyr. Úılestirýshi perzenthanalarmen baılanys jasap turady, eger qajettilik týyp jatsa perınataldyq ortalyqqa baryp, jas analardy sábılerin tastap ketpeýge úgitteıdi, «Analar úıinde» turýdy usynady. Jas analarmen birge táýlik boıy medbıke bolady. – Qazir elimizde 12 myń jetim bala bar eken. Jańa ortalyqta ár tár­­bıelenýshige 120 myń teńge qaras­tyrylǵan. Eń bas­tysy da, bul emes. Osyndaı analar úıin ashý arqyly jylyna 600 balany jetimdik taqsyretinen qutqarý mańyzdy bolmaq. Biz bala­lardyń balalar úıine jiberilýine jol bermeýimiz kerek. Olar bolashaqta túrli salanyń mamandary, el azamattary. Mundaı mańyzdy áleýmettik jobany qoldaýymyz kerek. Sonymen birge, tek jetimdik máselesin sheship qana qoımaı, naqty problemanyń sebepteriniń aldyn alýymyz qajet, – deıdi Islambek Saljanov. Kezdesýge qatysýshylar áleýmettik jobany jú­zege asyrýdy qoldaıtyndyqtaryn bildirdi, Aqtóbede taǵy bir «Analar úıin» ashýdy usyndy. Jaqyn kúnderde mundaı áleýmettik ońaltý ortalyqtary Aqtaý, Atyraý jáne Oral qalalarynda da jumys isteıtin bolady. Satybaldy SÁÝIRBAI, «Egemen Qazaqstan». Aqtóbe oblysy.