El astanasy Ottavanyń meri Djım Ýotson narazylyqtyń baqylaýdan shyqqanyn, al jınalǵan halyq sany kútkennen kóp ekenin habarlady. El úkimeti mıtınginiń turǵyndar qaýipsizdigine nuqsan keltirýi múmkin degen oıda. Búginde Ottava ortalyǵy jabylyp, kólik qozǵalysy toqtatylǵan. Keıbir basylymdar násildik qaqtyǵystar da bolǵanyn habarlaıdy.
Júk kóligi júrgizýshileriniń aksııasy tez arada kovıdtik shekteýlerge qarsy narazylyqqa ulasty. Narazylyq bildirýshiler Ottavanyń ortalyǵynda Parlamenttik tóbeniń janyna jınaldy, olar eldegi barlyq karantındik shekteýdi alyp tastaýdy talap etti. «Konvoı» músheleri premer-mınıstr Djastın Trıýdo úkimetine de narazylyq bildirýde.
Kanadalyq CFRA radıostansasyna bergen suhbatynda D.Ýotson narazylyq bildirýshiler óz is-áreketteri basqalarǵa qalaı áser etetinine mán bermeıtinin aıtty. Merdiń aıtýynsha, avtomobıl dabyldary, sırenalar men otshashýlar kóshelerdi quddy bı keshterine aınaldyryp jibergen. Al bul turǵyndardyń mazasyn qashyryp, berekesin ketirdi.
«Olardyń qasynda bizdiń daýysymyz estilmeıdi jáne bul shaıqastan utylýymyz múmkin. Alaıda óz qalamyzdy qalypty ómirge qaıtarýǵa mindettimiz», dedi shahar basshysy.
Ottava polısııasynyń habarlaýynsha, qala boıynsha kúzetke qoıylǵan júzdegen polısııa qyzmetkeri sársenbige deıin 23 adamdy qamaýǵa aldy. Qańtardyń 28-inde bastalǵan narazylyq aksııasy saıabyrsıtyn emes. Oǵan kórshiles elder de qoldaý bildirip jatyr. Al narazylar talaptary oryndalmasa, áli birneshe aı astana kóshelerinen ketpeıtinin habarlady.
