Aldymen stýdentterdiń datyna toqtala ketken jón.
«Stýdentterdiń kóbisi – kópbalaly ana, jalǵyz basty analar. Basqa oblystardan qatynaýǵa týra keletin stýdentterimiz bar. Olardyń barlyǵy osy qarajatty áreń kóterip júr. Negizi shart boıynsha jyldyq oqý aqshasy 336 myń teńge bolǵan. Biraq osy jınalysta bizge kúndizgi oqý formatyna kóshińder dedi, onda buǵan 555 myń teńge kóleminde aqsha qosylady», deıdi stýdent Mereı Merkibaı.
Qysqasy, qashyqtan dıplom alǵysy keletin stýdentterdiń alǵa tartqan taǵy bir máselesi – kúndizgi oqý formatyna kóshýmen birge oqý aqysyn burynǵydan edáýir kóp tóleýi.
«Qashyqtan oqýdy bastadyq pa, qashyqtan aıaqtaıyq, sol úshin oqýǵa túsip otyrmyz. Endi aıaqasty bizge aqpan aıynyń 20-nan naýryzdyń 20-na deıin kelip oqyńdar dep jatyr. Kóp qyzdar kele almaıdy. Sol úshin biz onlaın formatta oqıyq, ári qaraı osylaı aıaqtaıyq dep surap kelip otyrmyz», deıdi stýdent Roza Turǵymbekova.
Biraq onlaın otyryp, ustazdyq dıplom alǵysy keletin stýdentterge ýnıversıtet basshylyǵynyń aıtatyn ýáji basqa. Joǵary oqý ornynyń resmı ókili Jandar Asan tómendegideı túsinikteme berdi.
«Búginde ýnıversıtette qashyqtan bilim berý tehnologııasyn qoldana otyryp bilim alatyn stýdentterdiń sany shamamen 1 700 adamdy quraıdy. Bilim alýshylar oqý baǵdarlamasynyń dástúrli, ıaǵnı offlaın formatta ótýine qarsylyqtaryn bildirýde. Osy oraıda erekshe astyn syzyp ótetin nárse: Qazaqstan Respýblıkasynyń 2007 jylǵy 27 shildedegi «Bilim týraly» Zańynyń 5-babynyń 25-tarmaqshasyna jáne Qazaqstan Respýblıkasy Bilim jáne ǵylym mınıstriniń 2015 jylǵy 20 naýryzdaǵy №137 buıryǵyna (2021 jylǵy 25 aqpandaǵy №34 ózgerister men tolyqtyrýlarmen) sáıkes qashyqtan bilim berý tehnologııalary boıynsha oqý prosesin uıymdastyrý qaǵıdalary bekitildi. Joǵaryda atalǵan Erejeniń 25-tarmaǵyna sáıkes pedagogıkalyq ǵylymdar, quqyq, horeografııa, aspaptyq oryndaý, avıasııalyq tehnıka jáne tehnologııalar, qurylys, teńiz tehnıkasy jáne tehnologııalar, densaýlyq saqtaý, áskerı is, veterınarııa salasynda kadrlar daıarlaý úshin joǵary kásiptik oqytý uıymdarynda qashyqtan bilim berý tehnologııasyn paıdalana otyryp, pánderdi oqytýda akademııalyq kredıtterdiń jalpy kóleminiń 20%-y ǵana kózdelgen. Naqtyraq aıtqanda, oqý barysynyń qalǵan 80%-y dástúrli (offlaın) formatta ótkiziledi. Bul talaptar atalǵan bólimde oqıtyn stýdenttermen 2021 jylǵy 20 tamyzda ýnıversıtetpen jasasqan kelisim shartta egjeı-tegjeıli kórsetilgen», dedi ol.
Onyń aqparatyna súıener bolsaq, atalǵan bilim alý tehnologııasy arqyly oqıtyn stýdentter ýnıversıtette oqýdyń dástúrli formatta bastalýy 2022 jyldyń 21 aqpany men 20 naýryzy aralyǵynda, al jazǵy emtıhan sessııalary 30 mamyr men 26 maýsym aralyǵynda ótkizilmek. Bul týraly bilim alýshylarǵa aldyn ala eskertilgen eken.
«Kúndizgi bólimge qashyqtan bilim berý tehnologııasy arqyly túsken bilim alýshylardyń joǵaryda atalǵan ózgeristerge baılanysty túsinispeýshilik pen óz taraptarynan kelispeýshiliktiń týyndaýyna baılanysty dúısenbi kúni ýnıversıtette stýdenttermen arnaıy kezdesý uıymdastyryldy. Kezdesý barysynda ýnıversıtettiń basqarma tóraǵasy – rektory Gúlmıra Qanaı bilim alýshylar tarapynan týyndaǵan suraqtarǵa jan-jaqty jaýap berip, usynystardyń barlyǵyn nazarǵa alatynyn jetkizdi. Eń bastysy, stýdentterge de, ýnıversıtetke de ekijaqty ózara tıimdi sheshimderdiń tetikteri qarastyryldy. Ýnıversıtetimizdiń basty maqsaty – bilim alýshylar aldyndaǵy mindetimizdi sapaly oryndaý. Stýdentterdiń kóp bóligi jumys istep júrgen mamandar bolǵandyqtan, ýnıversıtet óz tarapynan múmkindiginshe yńǵaıly kúntizbe qoıyp, tólemaqydaǵy kútiletin ózgeristerdi de tómengi shekte ustaýǵa áreket jasaıdy», dedi J.Asan.
ALMATY
