Qaskóılerdiń izine túsken quqyq qorǵaýshylar táýlik boıy jumys isteıtin arnaıy mobıldi toptar qurdy. Bular úsh aýdanda brakonerlikke qatysy bar birneshe topty anyqtady. Zańsyz ańǵa shyqqan azamattardyń kólikterinen tirkelmegen qarý da tabyldy. Besqaraǵaı aýdanynda 29-42 jas aralyǵyndaǵy 4 er adam ustalyp, olardyń tórt elik atyp alǵany belgili boldy. Sonymen qatar kólik salonynan «Saıga» jáne «IJ» markaly eki myltyq, pyshaqtar, dúrbiler jáne 7,62 jáne 12 kalıbrli kóptegen patron tabyldy.
Al Tarbaǵataı aýdanynda tirkelmegen myltyqpen jabaıy qabandy atyp qulatqan 53 jastaǵy turǵyn ustaldy. Ruqsatsyz ań aýlaǵan azamattan qarýmen qatar oq-dáriler tárkilendi. Úshinshi brakonerlik jaǵdaı Borodýlıha aýdanynda oryn alǵan. Munda eki azamat ańshylyqqa qarda júretin motoshanamen shyqqan. Júırik shanamen júrip, qos elikti qanjyǵaǵa basypty. Tekserý kezinde «IJ» markaly tegis uńǵyly myltyq, oq-dáriler men pyshaqtar alyndy.
Shyǵys Qazaqstan oblystyq Polısııa departamenti bastyǵynyń orynbasary Talǵat Shaıahmetovtyń aıtýynsha, kúdikti azamattarǵa qatysty atalǵan barlyq faktiler boıynsha QR QK-niń 337-baby (zańsyz ań aýlaý) boıynsha sotqa deıingi tergeý júrgizilýde. Onyń sanksııasy negizinde 5 jylǵa deıingi merzimge bas bostandyqtarynan aıyrý jazasy kózdelgen.
Tártip qatal bolǵanymen, tabıǵatqa zalal keltirip júrgen brakonerler boı bermeı tur. Bálkim zańdy álde de kúsheıtý kerek pe, kim bilsin?! Áıteýir, zańsyz qarý asynyp, kóz janary móldiregen elikterdi sulatyp salyp júrgen azamattardyń bul áreketteri ashtyqtan emes, toqtyqtan ekeni aıtpasa da túsinikti.
Shyǵys Qazaqstan oblysy
