7 aqpanda máresine jetken mánerlep syrǵanaýdan komandalyq jarysta Reseı quramasynyń sportshylary 74 upaı jınap, óte úlken basymdyqpen jeńiske jetip edi. Ekinshi oryndy 65 upaımen AQSh olımpıadashylary ıelense, Japonııa quramasy 63 upaımen qola júldeni qanaǵat tutty. Reseı quramasy sapynan Kamıla Valıeva (sýrette), Mark Kondratıýk, Anastasııa Mıshına, Aleksandr Gallıamov, Vıktorııa Sınısına jáne Nıkıta Kasalapov Olımpıada chempıony atandy.
Dál sol kúni jarys jeńimpazdary marapattalyp, olarǵa tıesili medaldar tapsyrylýy kerek edi. Alaıda Halyqaralyq Olımpıada komıteti (HOK) marapattaý rásimine eki saǵat qalǵanda medal tapsyrý seısenbige, al sál keıinirek belgisiz ýaqytqa qaldyrylǵanyn málimdedi.
Al keshe Inside the Games basylymy mánerlep syrǵanaýdan komandalyq marapattaý rásimi Reseı quramasynyń sportshylarynyń biriniń dopıng testi oń nátıje kórsetýine baılanysty keıinge qaldyrylǵanyn jazdy. HOK-tyń kommýnıkasııalar jónindegi dırektory Mark Adamstyń málimetinshe, marapattaý rásimi Olımpıadanyń sońyna deıin ótkizilýi múmkin. Biraq ol jerde reseılik sportshylardyń bolý-bolmaýy belgisiz ekeni aıtylýda. Qazirgi tańda HOK jáne Halyqaralyq shańǵyshylar odaǵy (ISU) arasynda zańgerlik konsýltasııalar júrip jatyr.
Sondaı-aq keshe Batys basylymdary komandalyq jarysta óner kórsetken reseılik sportshylar Kamıla Valıeva, Mark Kondratıýk, Anastasııa Mıshına jáne Aleksandr Gallıamov sársenbi kúngi jattyǵý jıyndaryna qatyspaǵanyn jazdy. Biraq munyń dopıng daýyna baılanysty ekenine ázirshe eshkimde naqty dálel joq.
Reseılik basylymdardyń málimetinshe, Reseıdiń mánerlep syrǵanaý federasııasy dopıng daýyna baılanysty aqparatqa túsinikteme berýden bas tartqan. Al Reseı quramasynyń dárigeri Aleksandr Ozerov bul málimetti joqqa shyǵardy. Eger reseılik mánerlep syrǵanaýshylardyń birinen tyıym salynǵan zat tabylsa jáne ol rastalsa, onda Reseı quramasy Olımpıada altynynan aıyrylady.
10 aqpanda BAQ betterinde Kamıla Valıevanyń tyıym salynǵan preparat qoldandy degen kúdikke ilingeni habarlandy. 15 jastaǵy Qazan qalasynyń týmasy 2020 jyldan bastap eresekter arasyndaǵy jarystarda óner kórsete bastady. Sol jyly ol Reseı birinshilikterinde úzdikter qatarynan kórinip, 2021 jyly halyqaralyq jarystarda da boı kórsetti. Byltyr Rostelecom Cup 2021 jarysynyń eki baǵdarlamasynda 272,71 upaı jınap, álem rekordyn ornatty. Al jýyrda ǵana Tallınde máresine jetken Eýropa chempıonatynda top jaryp, qysqa baǵdarlamada da 90,45 upaımen jahan rekordyn jańartqan edi.
Aıta keteıik, keıingi jyldardaǵy dopıng erejesin jıi buzýyna baılanysty Reseıdiń Olımpıada komıteti (ROK) Halyqaralyq Olımpıada komıteti tarapynan jazalanyp, halyqaralyq iri jarystarda, atap aıtqanda, Tokıo-2020 jáne Beıjiń-2022 Olımpııa oıyndarynda memlekettiń aty, týy jáne ánuranymen óner kórsetýge tyıym salǵan edi. Resmı jarystarda reseılikterge Reseıdiń Olımpıada komıteti jáne onyń týy astynda ǵana jarystarǵa qatysýǵa ruqsat bergen. Al sportshylardyń qurmetine eldiń ánurany emes, Chaıkovskııdiń mýzykasy qoıylady.
