«KAMAZ» álemdegi aýyr júk kólikterin shyǵaratyn jetekshi kompanııalardyń jıyrmalyǵyna kiredi. Onyń óndiristik qýaty jylyna 71 myń mashına shyǵarýǵa múmkindik beredi.
Alys-jaqyn shetelderge kólik eksporttaıtyn bul kompanııanyń basshylyǵynyń aıtýynsha, Qazaqstannyń avtomobıl naryǵy óte mańyzdy baǵyt. Byltyrǵy jyldyń qorytyndysy boıynsha elimizdegi jańa júk kólikteri naryǵyndaǵy «Kamazdyń» úlesi 42 paıyz bolǵan. Atalǵan kompanııa Qazaqstanda birneshe jobany qolǵa alǵan. Sonyń biri – Qostanaı qalasynyń ındýstrııalyq aımaǵyndaǵy shoıyn quıý óndirisin iske asyratyn «KamLitKZ» zaýytynyń qurylysy. О́ndiristi 2024 jyldyń ekinshi jartyjyldyǵynda iske qosý josparlanyp otyr. Dál osy ındýstrııalyq aımaqta kóliktiń qural-saımandaryn shyǵaratyn zaýyt salynyp jatyr.
Kompanııa basshylyǵynyń aıtýynsha, Qazaqstanda aldaǵy ýaqytta «KAMAZ» kóligine qajetti qosalqy bólshekter shyǵarylmaq.
Memleket basshysy «KAMAZ» kompanııasynyń zaýyttarynda tájirıbe almasyp júrgen qazaqstandyq mamandarmen áńgimelesti. Osyndaı múmkindik týǵyzǵany úshin jumysshy jastar Qazaqstan Prezıdentine alǵys aıtty. Tájirıbe jınaý maqsatymen eki aıǵa kelgen jumysshylar Qostanaıda ashylatyn zaýytta jumys isteıtin bolady.
– Bul – ekonomıkamyzǵa tyń serpin beretin mańyzdy joba. Sizderdiń qajetti bilim alyp, tájirıbe jınaǵandaryńyz óte quptarlyq jaıt, – dedi Memleket basshysy.
Budan keıin Qasym-Jomart Toqaev ekonomıkanyń negizgi draıveri sanalatyn munaı óńdeý, mashına jasaý salalaryna arnalǵan jáne Tatarstannan shyǵatyn ózge de ónimder qoıylǵan kórmeni aralap kórdi.
