Áldı-áldı dúnıe! Myna ǵasyrdy ıyǵyna kóterip turǵan bir ýys meıirimdilik sekildi. Qalaı oılaısyz? «Aı bolmaı-aq qoıaıyn aspanyńda, Meıirimiń bolaıyn dos, baýyrǵa». Muzbalaq aqyn Muqaǵalıda sony meńzeıdi. Júrekke bitken jyr. Adam kóńiline túsken sáýleniń eń asyly da sol. Álemdi áldıleıtin áýen de sodan týady. Al ony qaıdan alamyz? Árıne, aýyldan. Bul eshqandaı anyqtama qajet etpeıtin jaýap. О́zińiz týǵan ólkeniń topyraǵyna tabanyńyz tıip, alpys eki tamyryńyz ıip qaıtatynyńyzǵa sózimiz kepil. Balalyǵyńnyń balabaqshasyndaı kóringen alaqandaı meken aqýyz tilegińe sep, qııalyńa qanat. Belgili sýretshi Rahman Bertileý «Apa men nemere» kartınasynda osyny aıtqysy kelgendeı.
Qoıanjon qum jotalardy qoınyna basyp jatqan aınakól aýyl úlken joldyń jıeginde ornalasqan. Baýraıy tolǵan jasyl jelek. Jerge japsyrylǵan kún ispetti kórkem. Kóktem kelse bolǵany sýretshiniń qııalyndaı ádemi kórinis paıda bolady. Kompozısııa keıipkeri sheberdiń ózi, baldaýren sátten bir úzik syr shertedi. Ájeniń alaqanynda ósken taqııaly balanyń maldyń sońynda júrip-aq meıirimge kenelgeni, jaılaýda jatyp-aq rýhanı órisi artqany baıqalady.
Jalpy, qylqalam sheberi shyǵarmashylyǵynda emosıonaldy kúıdiń jeteginde erip, qaǵazǵa túsken nárseniń bárin jan-tánimen sezinip beıneleıdi. Sodan da bolar ol keskindeme janrynda realızmniń jaqtaýshysy bolsa, grafıkada jumbaǵy kóp álemdi sýretteýde ózindik qoltańbasyn qaldyrǵyn naǵyz maıtalmannyń ózi.
О́nerdi zertteýshiler Rahman Bertileýdi peıjazdyń sheberi ekenin aıtady. Degenmen ol sýretshiler arasynda talǵam men baǵyttyń kóptúrliligine qaramastan, shynaıy oıdyń sheńberinen alystamady. Sýretshiniń qaı týyndysyn alyp qarasańyz da, joǵary kásibı daıyndyq menmundalap turady. Eń bastysy, biz avtordyń atalǵan shyǵarmasynan ózimizge kerek dúnıeni taba aldyq! Budan artyq ne kerek?!
