Jańa úı Oral qalalyq qurylys bóliminiń tapsyrysymen boı kótergen. О́ńirge belgili «Bolashaq-T» qurylys kompanııasy turǵyzǵan 9 qabatty úıdiń jalpy aýmaǵy – 15105,01 sharshy metr.
«Nurly jer» memlekettik baǵdarlamasy aıasynda qazaqstandyqtar jyl saıyn jańa baspanaǵa ıe bolyp keledi. Memleket basshysynyń tikeleı tapsyrmasy – halyqtyń ál-aýqatyn, turmystyq jaǵdaıyn jaqsartý. Búginde óńirde baspana máselesin sheshý jolynda barlyq jumys atqarylýda. Búgin tapsyrylyp otyrǵan turǵyn úı – memlekettik baǵdarlama aıasynda halyq ıgiligine berilip jatqan besinshi úı. Aldaǵy ýaqytta osy shaǵyn aýdanda jańa ortalyqtar, sport keshenderi salynady. Qoǵamdyq kólik máselesin de ońtaılandyramyz. Basty maqsat – turǵyndardyń ál-aýqatyn arttyryp, qolaıly ómir súrýge jaǵdaı jasaý, – dedi qala ákimi Abat Shynybekov turǵyndarǵa páter kiltin tapsyrý sátinde.
Jańa páter ıelerin «Otbasy bank» AQ oblystyq fılıaly dırektorynyń orynbasary Rınat Kýsmanov ta quttyqtap, jańa páter ıelerine baq-bereke tiledi.
14 jyl boıy turǵyn úı kezeginde turyp, memlekettik baǵdarlama aıasynda eki bólmeli páterge qol jetkizgen Raıhan Bektemirova sońǵy kezde memleketimizde halyq ıgiligi úshin kóp is jasalyp jatqanyn aıtyp, rızashylyq sezimin bildirdi.
Ákimdik baspasóz qyzmetiniń habarlaýynsha, sońǵy on jyl ishinde Oral qalasynda memlekettik baǵdarlamalar aıasynda 67 kóppáterli turǵyn úı paıdalanýǵa berilgen.
Batys Qazaqstan oblysy
