Jumada jerlesterimiz sporttyń tórt túri boıynsha saıysqa tústi. Solardyń arasynan short-trek sheberleri ǵana táýir nátıje kórsetti. Erlerdiń 500 metrlik básekesinde baq synaǵan Denıs Nıkısha, Ádil Ǵalıahmetov jáne Abzal Ájiǵalıev syndy saıypqyrandar irikteý synynan irkilmeı ótip, shırek fınalǵa joldama aldy. Osy oraıda óz tobynda Denıs pen Abzal birinshi oryn alsa, Ádil máre syzyǵyn ekinshi bolyp qıyp ótkenin aıta ketken jón.
Shańǵyshylar klassıkalyq ádispen 15 shaqyrymǵa júgirdi. Bul qashyqtyqta 30 jastaǵy fınlıandııalyq sportshy Iıvo Henrık Nıskanenge teń keler eshkim tabylmady. Osylaısha, Sýomı eliniń ókili qatarynan úsh birdeı Olımpııa oıyndarynda bas júldeni oljalady. Buǵan deıin Nıskanen 2014 jyly Sochı jáne 2018 jyly Phenchhandaǵy oıyndarda atoı salǵan. Kúmis medaldy reseılik Aleksandr Bolshýnov ıelense, norvegııalyq Iohannes Hesflot Klebo qolaǵa qol sozdy. Osy jarysta synǵa túsken Qazaqstannyń qos shańǵyshysynyń óneri kóńilden shyqpady. Vıtalıı Pýhkalo 25-oryndy enshilese, Evgenıı Velıchko 40-orynda qalyp qoıdy.
Bıatlonshylardyń sprıntinde negizgi básekelestik Skandınavııa túbeginiń qos sulýy – 31 jastaǵy norvegııalyq Marte Olsbıý-Roıselann men 22 jasar shvesııalyq Elvıra Eberg arasynda órbidi. Ekeýi birazǵa deıin tartysty. Nátıjesinde, tájirıbeli Olsbıý-Roıselann kózdegen maqsatyna qol jetkizip, altynnan alqa taqty. Edberg ekinshi oryndy qanaǵat tutsa, ıtalııalyq Doroteıa Vırer úshinshi satyǵa taban tiredi. Otandastarymyz arasynan tek Galına Vıshnevskaıa-Sheporenko jarys jolyna shyqty. Ol 52-orynǵa turaqtady.
Shańǵymen tramplınnen sekirýshilerimiz de senim údesinen shyǵa almady. Erejege saı jarystyń fınaldyq bóligine tek úzdik 50 sportshy ǵana joldama alady. О́kinishke qaraı, jerlesterimiz belgilengen mejeden kórine almady. Bul básekede Danıl Vasılev 51-satyǵa jaıǵassa, Sergeı Tkachenko 54-orynda turaqtady.
Senbide alty júlde jıyntyǵy sarapqa salyndy. Qazaqstan qurama komandasynyń músheleri úsh sport túrinen synǵa tústi. Shańǵyshylardyń 4h5 shaqyrymdyq estafetasynda quramynda Nadejda Stepashkına, Ksenııa Shalygına, Angelına Shýryga jáne Valerııa Tıýleneva bar otandastarymyz jarysty 15-orynmen qorytyndylady. Bul básekede Reseıdiń ekpinine eshkim shydaı almady. Ekinshi jáne úshinshi oryndardy Germanııa men Shvesııa ıemdendi.
Konkıshiler básekesin jergilikti jankúıerler taǵatsyzdana kútti. Sebebi sol jarysta kúlli Qytaıdyń maqtanyshy Gao Tınıý baq synady. Bul sportshyǵa beker senim artylmaǵan eken. 500 metrlik qashyqtyqty 34,32 sekýndta júgirip ótken ol bas júldeni oljalaýmen qatar, olımpıadalyq rekordty jańartty. Koreıalyq Cha Mın Kıý kúmis medaldy moınynda jarqyratsa, japonııalyq Morısıge Vatarý qola júldeni enshiledi. Osy jaıttyń ózi qysqa qashyqtyqta Azııa qurlyǵy ókilderiniń aldyna eshkim túse almaıtynyn ańǵartty. Bizdiń Ivan Arjannıkov 35.82 sekýndtyq kórsetkishpen 28-orynǵa taban tiredi.
Bıatlonshylardyń 10 shaqyrymdyq sprıntinde Qazaqstannyń namysyn Vladıslav Kıreev pen Aleksandr Mýhın qorǵady. Biraq ekeýinen de qaıyr bolmady. Mýhın 49-oryn alsa, Kıreev 77-satyǵa jaıǵasty. Sporttyń bul túrinde aǵaıyndy Belerdiń baǵy jandy. 28 jastaǵy Iohannes osy Olımpıadada ekinshi márte jeńis tuǵyrynyń eń bıik satysyna kóterilse, onyń týǵan aǵasy Tareı qola medaldy ıelendi. 33 jastaǵy norvegııalyq sportshy ǵalamdyq dodanyń alǵashqy altynyna osydan 12 jyl buryn Vankýverde qol jetkizgen bolatyn. Odan bólek, Tareı Beniń qorjynynda álem chempıonatynyń 11 altyny, 2 kúmisi jáne 8 qolasy bar. Endi aǵasynyń jeńisti jolyn jalǵastyrýǵa Iohannes erekshe qulshynyspen kiristi. Fransııanyń betkeustary Kenten Fııon Maıe qola júldeni qanjyǵasyna baılady.
Sóz oraıy kelgende, Semen Elıstratov jaıynda bir-eki aýyz sóz aıta ketsek, esh aıyby joq dep oılaımyz. 31 jastaǵy Reseıdiń short-trek sheberi 1500 metrlik qashyqtyqta qola medaldy ıelendi. Ol sońǵy kezderi óziniń jeke jattyqtyrýshysy, bul kúnderi Qazaqstan ulttyq quramasynyń keńesshi-bapkeri qyzmetin atqaryp otyrǵan Andreı Maksımovpen birge bizdiń elde jattyǵyp júr. Beıjińdegi básekeden keıin ol BAQ ókilderine bergen suhbatynda «Men qonaqjaı qazaq halqyna basymdy ıip turyp, alǵys aıtqym keledi. Olımpııa oıyndary qarsańynda olar bizdiń esh alańsyz jattyǵýymyz úshin qolaıly jaǵdaıdyń barlyǵyn jasady. Ulttyq Olımpıada komıtetine de rızashylyǵym sheksiz. Sol sebepti de meniń Beıjińdegi medalim barlyǵymyzǵa ortaq. Short-trek sporty Qazaqstanda da qaryshtap damyp keledi. Soǵan men qatty qýanyp otyrmyn. Ásirese Ádil Ǵalıahmetovke rızamyn. Bul – onyń alǵashqy Olımpıadasy. Men oǵan «Ádil, erinbeı eńbekten, sonda sen de jeńis tuǵyryna kóterilesiń. Sen jassyń, keleshekte áli talaı belesterdi baǵyndyrasyń. Barlyǵy da eńbek pen tabandylyq arqyly keledi», dep san qaıtalaýdan jalyqqan emespin. Basqa da jigitterdiń aıaqalysy qýantady. Dál osy komanda keleshekte tolaǵaı tabystarǵa qol jetkizetinine senimdimin», dep Semen aqtaryla sóıledi.
Jeksenbige deıingi jaǵdaıǵa kelsek, Germanııa men Norvegııa quramalary jalpykomandalyq esepte kósh basynda qatar keledi. Nemister 8 altyn, 5 kúmis jáne 1 qolany oljalasa, skandınavııalyqtar 8 altyn, 3 kúmis jáne 6 qolany enshiledi. Osy qos memleket ókilderiniń qaısy sýrylyp shyǵatyny aldaǵy kúnderi belgili bolady. Úshinshi oryndaǵy AQSh sportshylarynyń 13 (5 altyn+5 kúmis+1 qola) júldesi bar. Tórtinshi jáne besinshi satylarǵa Nıderland (5+4+2) pen Shvesııanyń (5+2+3) órenderi jaıǵasty. Sondaı-aq «TOP-10» komandanyń qatarynda Aýstrııa (4+6+4), Qytaı (4+3+1), Reseı (3+4+6), Italııa (2+5+4) jáne Japonııa (2+3+5) quramalary bar.
