Aqmola oblysynyń polısııa departamenti jol apaty 13-aqpanda Nur-Sultan - Qabanbaı batyr - Kıevka avtojolynyń 19-shaqyrymynda bolǵanyn habarlady.
Aldyn ala anyqtalǵandaı, elordanyń 37 jastaǵy turǵyny JAC markaly avtokóligimen Qosshy qalasynan shyǵyp, Abaı kóshesimen Nur-Sultanǵa qaraı bet alǵan. Elordadan Qabanbaı batyr aýylyna qaraı Lada Priora tizgininde basqarýdy ıgere almaǵan Nur-Sultannyń basqa turǵyny qarsy jolaqqa shyǵyp, JAC-pen soqtyǵysty.
«Jol apaty saldarynan LADA Priora avtokóliginiń júrgizýshisi men eki jolaýshy oqıǵa ornynda kóz jumdy. 37 jastaǵy JAC júrgizýshisi elordanyń medısınalyq mekemesine jetkizildi», dep naqtylady Aqmola oblysy PD baspasóz qyzmeti.
Atalǵan fakti boıynsha QR QK 345-baby 4-bóligi boıynsha sotqa deıingi tergeý bastaldy.
