QOǴAMDYQ MÁRTEBE SENATTA QOLDAÝ TAPTY

Keshe Senat Tóraǵasy Qasym-Jomart Toqaevtyń tóraǵalyǵymen palatanyń kezekti plenarlyq otyrysy bolyp, kún tártibinde segiz másele qaraldy. Solardyń alǵashqy ekeýi elimizdiń Tuńǵysh Prezıdenti N.Á.Nazarbaevtyń qoǵamdyq mártebesin Elbasy retinde zańnamalyq bekitýge qatysty boldy. Buǵan deıin Májilis tarapynan qol­daý tapqan “Qazaqstan Respýblıkasynyń keıbir konstıtýsııalyq zańdaryna Qa­zaqstan Respýblıkasy Tuńǵysh Prezı­denti­niń – Elbasynyń qyzmetin qamta­masyz etý salasynda zańnamany jetildirý máseleleri boıynsha ózgerister men to­lyqtyrýlar engizý týraly” Konstıtý­sııa­lyq Zańnyń jobasy men “Qazaqstan Res­pýblıkasynyń keıbir zańnamalyq akti­le­r­i­ne Qazaqstan Respýblıkasy Tuńǵysh Prezıdentiniń – Elbasynyń qyzmetin qamtamasyz etý salasynda zańnamany je­tildirý máseleleri boıynsha ózgerister men tolyqtyrýlar engizý týraly” zań jo­basyn (birinshi oqylym) Májilis depý­taty Rozaqul Halmuradov tanystyrdy. Zań jobasy bastamashylarynyń biri halyqaralyq qoǵamdastyq qashanda ultty, halyqty ozyq tulǵalary arqyly tanı­tyndyǵyn alǵa tartty. Olaı bolsa, qazaq elin, qazaq jerin, táýelsiz Qazaq mem­le­ketin álemge tanytqan Tuńǵysh Prezıdent N.Nazarbaev. Talaı qıyndyq pen qyl kópirden áýpirimdep halqyn aman alyp ótip, ózi qurǵan memleketti jetelep, álem­niń ozyq elderiniń qataryna qosa bas­ta­ǵany teńdesi joq erlik, álemdik qoǵam­dastyq áldeqashan moıyndaǵan aqıqat, dep sanaıdy Rozaqul Satybaldyuly. Baıandama aıaqtalysymen senatorlar zań jobalaryna qatysty pikirlerin ortaǵa saldy. Orynbaı Rahmanberdıev Keńes Odaǵy ydyraǵannan keıingi ótpeli kezeńniń qıyndyqtaryn tilge tıek ete kelip, bylaı dedi: “Osyndaı qıyn-qystaý jaǵdaıda, syn saǵattarda elimizdiń baǵyna oraı bılikte úlken tulǵa turdy. “Halyqty jasaıtyn tarıh, tarıhty jasaıtyn jeke tulǵalar” degen qaǵıdaly sóz bar. Qazaqstan Respýblıkasynyń Tuńǵysh Prezıdenti N.Á.Nazarbaev osyndaı tulǵalardyń biri de biregeıi”. Budan keıin sóz alǵan Iran Ámirov memleketimizdiń ishki jáne halyqaralyq jetistikteri Tuńǵysh Prezıdenttiń dara tul­ǵasymen baılanysty ekendigine erek­she toqtaldy. “Qazaqstan Respýb­lı­ka­sy­nyń Prezıdenti Dostastyq el­de­ri ishinde “áıgili saıasatker” dep tanyldy. Nursul­tan Nazarbaev zańdy túrde qazirgi zaman kóshbasshysynyń etalonyna aınaldy. Onyń boıynda zııatker­lik-jańashyldyq, ulttyq bedel bar”, dedi senator. Nátı­je­sinde negizgi zań jobasy tutastaı qoldaý taýyp, ilespe zańdyq qujat ekinshi oqy­lymda qaraý úshin kún tártibine engizilip baryp qabyldandy. Osy rette senatorlar da, Senat Tór­aǵa­sy da zań jobalarynyń mańyzyn erek­she ashyp kórsetti. Tuńǵysh Prezı­dent – Elbasy tý­ra­ly zańnyń qabyl­da­nýy Qazaq­stan­daǵy memleket quryly­syn­daǵy asa mańyzdy kezeń bolyp taby­la­dy. Bul – Prezıdent N.Nazarbaev­tyń mártebesine baılanysty máse­lelerdi zańdyq turǵyda bekitetin erekshe zań. Tek Qazaqstan azamat­tary ǵana emes, sheteldik qaı­rat­kerler de Prezıdenttiń kúshti kósh­basshylyǵynyń arqasynda Qazaq­stan tabysty damýǵa qol jetkizdi, ıadrolyq qarýdy taratpaý rejimin bekitýge, halyq­aralyq jáne aımaq­tyq qaýipsizdikti nyǵaıtýǵa zor úles qosty dep sanaıdy. Prezıdent burynǵy keńes ımperııasynyń qırandysynan shyqqanymen tıimdi áreket etetin memleket qura aldy. Qa­zaq­stan ekonomıkalyq daǵdarys­tan az ǵana shyǵynmen shyqty jáne turaqty damý úr­disin saqtap qaldy. Prezıdentke Elbasy már­tebesin bekitetin zańdy qabyldaı otyryp, Parlament Qazaqstan halqy al­dyndaǵy qyzmeti orasan zor Nursultan Ábishulynyń kór­nek­ti memleket qaırat­keri retinde sińirgen eńbegin laıyqty baǵalady. Sondaı-aq otyrysta “Qazaq­stan Res­pýblıkasynyń Úkimeti men Reseı Fede­rasııasynyń Úkimeti arasyndaǵy Reseı Federasııa­sy­nyń “Baıqońyr” keshenin jalǵa alý jaǵdaıynda Baıqońyr ǵarysh aılaǵynyń personalyna, Baıqo­ńyr qalasynyń, Tóretam jáne Aqaı kentteri­niń turǵyndaryna medısınalyq qyzmet kórsetý tártibi týraly kelisimdi ratıfı­ka­sııalaý týraly”, “Qazaqstan Res­pýb­lı­ka­synyń Úkimeti men Fın­lıan­dııa Respýblıkasynyń Úkimeti arasyndaǵy Tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly kelisimdi jáne oǵan qatysty hattamany ratıfıkasııa­laý týraly”, “Qazaqstan Respýb­lıkasy men Ispanııa Koroldigi arasyndaǵy Strategııalyq áriptes­tik týraly shartty ratıfıka­sııa­laý týraly”, “1995 jylǵy 23 jeltoq­san­­daǵy Qazaqstan Respýblıkasy men Reseı Federasııasy arasyn­da­ǵy Baıqońyr qalasynyń mártebesi, ondaǵy atqarýshy ókimet organda­ryn qurýdyń tártibi men olardyń mártebesi týraly kelisimge ózgeris­ter men tolyqtyrýlar engizý tý­raly hattamany ratıfıkasııalaý týraly” zańdar qabyldandy. Asqar TURAPBAIULY.