12-týrdan keıingi jaǵdaı boıynsha «Atyraý» týrnır kestesinde 27 upaımen kósh bastaǵan bolsa, eki oıyn kem ótkizgen «Qaırat» 25 upaımen kele jatqan-dy. Eki ujym arasyndaǵy senbi kúngi alǵashqy oıynda (13-týr) Almatynyń «Qaıraty» qarsylastarynyń qaqpasyna jaýapsyz bes gol soǵyp, iri eseppen jeńiske jetti. Bıylǵy Eýro-2022 chempıonatynyń úzdik surmergeni Birjan Orazov dýbldiń avtory atansa, Vıtao, Igıta jáne Albert Aqbalyqov bir-bir retten mergendik tanytty.
Kelesi kúngi matchta (14-týr) komandalardyń kúshteri teń boldy – 2:2. Degenmen bul kezdesý de «Qaırattyń» jeńisimen aıaqtalýy da múmkin edi. Alaıda «Atyraý» fýtzalshylary tez arada esepti teńestirip úlgerdi. Almatylyqtar sapynan bul oıynda Vıtao men Birjan Orazov kózge tússe, «Atyraýdan» Deo men Jako Amandosov gol soqty.
Eki oıynnyń qorytyndysy boıynsha «Qaırat» 29 upaımen kósh basyna shyqty. Al «Atyraý» 28 upaımen ekinshi orynǵa túsip qaldy.
