«Sıfrlyq maınıng boıynsha negizgi sharalar 3 baǵyt boıynsha júrgiziledi. «Sur maınerler» boıynsha, Energetıka mınıstrligi jáne quqyqtyq organdardan qurylǵan mobıldi toptardyń revolverlik tekserý júıesi engiziledi. Sondaı-aq olardy júıeli túrde anyqtaý úshin uıymdardyń tizimi jasalyp, tutynylatyn elektrenergııanyń tarıhı derekteri qurylady jáne salyqtyq, kedendik tekserýlerdiń naqty algorıtmi qoldanylady», dedi ol.
Odan bólek, ýákiletti organdarmen birlese otyryp, IR adresterge shekteý qoıý arqyly sur maınerlerdiń is-áreketine tyıym salý tetikteri pysyqtalady.
«Sondaı-aq tıimdi sheshimderdiń biri – «sur maınerlerdiń» múlkin tárkileý zańnamada qarastyrý máselesi talqylanady. Atalǵan sharalar Ulttyq qaýipsizdik komıteti, Energetıka jáne Qarjy mınıstrlikterimen birlesip qabyldanady. Naryqty retteý boıynsha sıfrlyq maınıngti lısenzııalaý engiziledi. Munda negizgi krıterıı - tehnıkalyq talaptarǵa sáıkes bolý, ıaǵnı qajetti jabdyqtardyń, órt qaýipsizdigi boıynsha tıisti bólmeniń jáne mindettemelerdiń bolýyn qarastyrý», dedi mınıstr.
Sondaı-aq arnaıy tarıfti engizý, elektr energııasyn kvotalaý júıesi naryq músheleri men jalpy memleket úshin ashyq jáne túsinikti naryq qaǵıdattaryn ornatady.
«Halyqaralyq tájirıbeni eskere otyryp, salyq salýdyń ońtaıly júıesi aıqyndalady. Sondaı-aq ESG talaptaryn saqtaý turǵysynan «aq maınerlerge» qarsy mindettemeler qoıylady. Sıfrly aktıvter jónindegi zań jobasy bir top májilis depýtattarymen bastamashylyq etilgen bolatyn. Bul is-sharalar atalǵan zań jobasynyń aıasynda talqylanady», dedi Baǵdat Mýsın.
Odan bólek, elimizde halyqaralyq standarttarǵa sáıkes keletin krıptoındýstrııa salasyn damytý úshin ekojúıeni qurý boıynsha sharalar qabyldanady. Atap aıtqanda, krıptobırjalardy qurý, krıptobırja qatysýshylary úshin banktik qyzmet kórsetýdi iske qosý jáne maınıngtik pýldardy qurý.
Mınıstrdiń aıtýynsha, bul sharalar naryqta naqty jáne aıqyn erejelerdi ornatýǵa, elektr jelisin shamadan tys júktelýin boldyrmaýdy jáne maınıngtik fermalardyń kópshiligin «sur aımaqtan» shyǵarýǵa oń áserin tıgizedi.
