Sýretterdi túsirgen Erlan OMAR, «EQ»
Ulttyq qoǵamdyq senim keńesiniń tórtinshi otyrysynda Memleket basshysy Qasym-Jomart Toqaev «Taǵy bir mańyzdy mindet – mektep kitaphanalarynyń kitap qoryn jańalaý jáne tolyqtyrý. Qazir bul kitaphanalardyń qory eskirgen ári jutań. Ásirese kórkem týyndylar men tartymdy ádebıetter tapshy. Qazaq tilindegi tıisti ádebıetter óte az nemese múldem joq. Oqýshylardyń álem ádebıeti klassıkteriniń shyǵarmalaryna qoly jete bermeıdi», deı kele elimizdiń Bilim jáne ǵylym mınıstrligine tıisti tapsyrmalar bergen bolatyn. Osy oraıda oqýshylardyń bilimine bilim, aqylyna aqyl qosatyn «Oqýǵa qushtar mektep» jobasy ázirlenip, qoldanysqa engizildi.
Bul joba joqtan bar jasaý, bolmasa qaǵaz júzinde ǵana iske asatyn kózdi aldaý áreketi emes. «Oqýǵa qushtar mektep» degenińiz eń aldymen mektep kitaphanalaryn kórkem ádebıetpen tolyqtyrý, oqýshylardy kitap oqýǵa tartý, ony ádetke aınaldyrý úshin túrli is-sharalar ótkizý, kitaphanalarda qolaıly jaǵdaı jasaý, jóndeý jáne jabdyqtaý, kitaphanashylardyń biliktiligin arttyrý syndy aýqymdy jumystardy qamtıtyn máni men mańyzy bólek bastama.
«Oqýǵa qushtar mektep» jobasy Memleket basshysynyń tapsyrmasy boıynsha júzege asyrylýda. Biz qoıylǵan mindetti oryndap jatyrmyz, qazirdiń ózinde oń nátıjeler bar dep aıtýǵa bolady. Joba iske asyrylǵannan bastap mektep kitaphanalarynda kórkem ádebıet sany aıtarlyqtaı ósti, onyń ishinde memlekettik tildegi ádebıetter. Eger buǵan deıin qazaq tilindegi ádebıetter az bolsa, qazir kitap qorynyń basym bóligin memlekettik tildegi ádebıetter tolyqtyrdy. Sonymen qatar tek qazaqstandyq avtorlardyń ǵana emes, álemdik ádebıet týyndylary da bar. «Oqýǵa qushtar mektep» – óte mańyzdy joba, sondyqtan bul jumysty jalǵastyrý qajet», deıdi Bilim jáne ǵylym mınıstri Ashat Aımaǵambetov.
Máselen, byltyr qazan aıynda atalǵan joba aıasynda elimizdegi mektep kitaphanalaryna 2,5 mln-ǵa jýyq kórkem ádebıet satyp alyndy. Atalǵan kitaptardyń basym bóligi Shyǵys Qazaqstan, Jambyl jáne Pavlodar oblystarynda satyp alynyp, kitaphana qorynyń basym bóligi memlekettik tildegi ádebıettermen tolyqtyryldy. Respýblıkalyq ǵylymı-praktıkalyq bilim berý mazmunyn saraptaý ortalyǵynyń dırektory Eldos Nurlanovtyń aıtýynsha, osy jobany iske asyrý kezeńinde mektep oqýshylarynyń kitaphanaǵa degen qyzyǵýshylyǵy arta tústi. «Osy oqý jylynan bastap Túrkistan, Pavlodar, Soltústik Qazaqstan jáne Qostanaı oblystarynda bir oqýshy kitaphanaǵa orta eseppen 10 retten astam, al Almaty, Shymkent qalalarynda, Qyzylorda, Mańǵystaý, Atyraý jáne basqa da oblystarda 6-9 ret barǵan. Bul balalardyń kórkem ádebıetke kóbirek qyzyǵýshylyq tanyta bastaǵanyn kórsetedi», deıdi E.Nurlanov.
Rasymen de, «Oqýǵa qushtar mektep» jobasy qolǵa alyna bastaǵannan beri mektep kitaphanalary men ondaǵy oryndar sany kóbeıdi. Mektepterde balalardyń kitap oqýy úshin qolaıly jaǵdaı jasalyp jatyr. Árıne, «Oqýǵa qushtar mektep» jobasy aıasynda qolǵa alynyp jatqan ózge de is-sharalar, túrli tásilder, tyń bastamalar jetip artylady. Onyń barlyǵyn tilge tıek etý múmkin emes. Eń bastysy, erteńgi el jastary kózi ashyq, kókiregi oıaý bolyp ósýi úshin memleket tarapynan mańyzdy qadamdar jasalyp jatyr. О́skeleń urpaq osyny túsinip, baǵalaýy kerek. Ol úshin ustazdar, kitaphanashylar, ata-analar qaýymy aıanbaı ter tógip, jas býyndy kitap oqýǵa qyzyqtyrýdyń, yntalandyrýdyń jolyn tabýy qajet. Jańa Qazaqstandy búgingi aǵa býyn keleshek jas urpaqqa sapaly bilim, taǵylymdy tárbıe berýmen qalyptastyrady.
Aqtoty TEZEKBAEVA,
Yntymaq jalpy bilim beretin mekteptiń dırektory
Qaraǵandy oblysy,
Jańaarqa aýdany
