Kishkentaı ónertapqyshtar jumystaryna bir jyl ýaqyt jumsaǵan. Mysaly, Ámına Tursynǵalıeva men Rada Kenchenbaevalardyń «Qaraǵaı – densaýlyq kepili» atty jobasy mynaý indet órshigen zamanda óte ózekti taqyryp. Kúrdeli jobany qolǵa alǵan olar kádimgi qaraǵaıdan dárilik preparat daıyndaý múmkindigin dáleldedi. Bal, qant, spırt qosylǵan qaraǵaı búrlerinen emdik sıroptar jasap kórdi. Jasaǵan dárilik shyryndary joǵarǵy tynys alý joldary aýrýlarynyń aldyn alýǵa paıdaly desedi. Sondaı-aq ımmýnıtetti kúsheıtedi. Dál osy ǵylymı jumysta qaraǵaı shaıyryn alýdyń tıimdi joldary da kórsetilgen. Shaıyrdyń ózi myń da bir aýrýǵa em. Medısına tilimen aıtsaq, aýyz qýysynyń aýrýlaryna qarsy fıtonsıd bolyp esepteledi eken. Zııandy mıkroaǵzalardyń ósýin toqtatyp, baryn óltiredi.
– Oqýshylarymyz jasap jatqan dárilik shyryndardyń quramyna uqsas dáriler naryqta satylymda bar. Bizdiki sertıfıkattalmaǵan degeni bolmasa, dárilik qasıeti zor. Shákirtterimiz aldaǵy ýaqytta emdeıtin aromaterapııalyq shamdar jasaýdy oılastyryp jatyr, – deıdi ǵylymı jetekshilerdiń biri Albına Ishmýhametova.
Al Darhan Poezqanov pen Arýjan Mahambetovalardyń «Kartoptyń ónimdiligine tyńaıtqyshtyń áseri» taqyrybyndaǵy joba Semeıde buryn-sońdy qolǵa alynbaǵan.
– Kartop ónimdiligin arttyrý maqsatynda jumys istegen oqýshylarymyz da az ter tókpedi. Zertteý jumysy úshin jumyrtqa qabyǵy, aǵash kúli, kóń jáne pııaz qabyǵy syndy turmystaǵy organıkalyq jáne beıorganıkalyq zattardy qoldandy. Zertteý kezinde aǵash kúli men jumyrtqa qabyǵynyń artyqshylyǵy baıqaldy. О́ıtkeni osy tyńaıtqyshtar qosylǵan kartop túıinderiniń salmaǵy anaǵurlym artyq boldy, – deıdi jetekshileri Aınur Sadyqova.
Súıinshili jańalyq, ónertapqysh oqýshylar osy eńbekterimen Vilim-orkenieti ulttyq ınnovasııalyq ǵylymı zertteý ortalyǵy uıymdastyrǵan respýblıkalyq «Úzdik ǵylymı joba avtory» baıqaýynyń jeńimpazy atandy. Jas zertteýshilerge I dárejeli dıplom, kýálik, tósbelgi tabystalyp, eńbekteri materıaldar jınaǵyna engizildi.
Shyǵys Qazaqstan oblysy
