Oqıǵa 14 aqpanda saǵat 19:00-de Pavlodar-Qyzylorda tasjolynda bolǵan.
Málimet boıynsha, oqıǵa kezinde apattyń ekinshi qatysýshysy oqıǵa ornynan ǵaıyp bolǵan.
Telefon arqyly suhbat bergen Pavlodar oblysynyń burynǵy ákimi Bolat Baqaýov jol apatyna túsken Lexus LX 570 avtokóliginiń tizgininde ózi otyrmaǵan. Onyń sózine qaraǵanda, kólikti júrgizýshi aıdaǵan, ózi eshqashan kólik tizginin ustamaǵan. Qozǵalys kezinde ekinshi Lexus Bolat Baqaýov mingen kólikti basyp ozyp, aldynda kele jatqan GAZelmen soqtyǵysqan.
«Jol talǵamaıtyn kólik júrgizýshisi oqıǵa ornynan qashyp ketti. Árıne, bul durys emes. Esikti ázer ashtyq, órtenýimiz de múmkin edi. Meniń júrgizýshim jolshybaı ótken mashınaǵa minip Lexus júrgizýshisin qýyp jetpek boldy. Biraq ustaı almady», deıdi Bolat Baqaýov.
Eks-ákimniń aıtýynsha, artynsha qashyp ketken Lexus LX 470 júrgizýshisi otbasymen birge kele jatqandyqtan shoshyp ketkenin, keıin tasjoldaǵy bir jaqty qozǵalys sebebinen oqıǵa ornyna keri burylyp kele almaǵanyn aıtqan. Shidertige jetkende ǵana oqıǵa ornyna qaıta oralǵan.
«Eń bastysy, bárimiz amanbyz. Bul qýanatyn jaǵdaı», dedi Bolat Baqaýov.
Al 2020 jyly sottalyp, shartty túrde bostandyqta júrgen eks-ákim oblys ishi men syrtynda emin-erkin júrýine qatysty saýalǵa jaýap berdi. Ol zań boıynsha Qazaqstan aýmaǵynda júre alatynyn, tek aldyn ala quzyrly organdarǵa eskertýi kerektigin aıtty.
Aıta keteıik, úsh avtokólik qatysqan JKO 14 aqpanda saǵat 19:00-de Pavlodar-Qyzylorda trassasynyń 159-shaqyrymynda Báıet aýylynyń mańynda boldy. Polısııa ókilderiniń málimetinshe, júk kóligi medısınalyq kómekke júgingen. Atalǵan fakt boıynsha polısııa tekserý júrgizip jatyr.
