Úkimet qaýlysymen bekitilgen Jańaózen qalasyn damytýdyń keshendi josparynyń aıasynda atqarylýdaǵy aýqymdy jumystarmen tanysyp, ózendiktermen jıi kezdesý oblys ákimi Qyrymbek Kósherbaevtyń qalyptasqan daǵdysy. Osy jyldyń úsh aıynda ǵana 1705 adam jumyspen qamtylypty. Bul ótken jylǵydan 2,1 ese kóp. Shaǵyn kásipkerlik sýbektilerine nesıe berýde bankter men kelisim-shartqa otyrý óse túsken. Qalany sýmen, jylýmen, gazben jabdyqtaýdy odan ári ulǵaıta túsýdiń jobalyq-smetalyq qujattary jasalyp, memlekettik saraptamadan ótkizilýde. Qala joldaryn salý men kúrdeli jóndeýge 500 mln.teńge qaralypty. Keshendi josparǵa saı áleýmettik sala úshin 12 nysan qurylysy bastalmaqshy. Sondaı-aq qalany kóriktendirý, kógaldandyrýǵa bólingen qarjy kólemi de ótken jylǵydan edáýir kóbeıtilipti.
Jolaman BOShALAQ, Mańǵystaý oblysy, Jańaózen qalasy.
139 000 000 Oblys ortalyǵyndaǵy “Avtopark” JShS osynshama qarjyǵa salonyna 110 jolaýshy ala alatyn syıymdylyǵy úlken “LIAZ” markaly 15 avtobýs satyp aldy. Olardyń árqaısysy 9,2 mıllıon teńge turady. Bul avtobýstar qalanyń ortalyq kóshelerindegi baǵyttarǵa jiberildi. Seriktestik taǵy da syıymdylyǵy úlken Qytaıda shyǵarylǵan 10 avtobýs ákelmek. Mundaı avtobýstardyń baǵyttarǵa shyǵarylýy jolaýshylarǵa qolaıly jáne tasymal qyzmetiniń sapasyn arttyratyn bolady. Aqtóbe qalasyndaǵy jolaýshylar tasymalyn atqaratyn irgeli kásiporyn – “Avtopark” JShS jyl ótken saıyn avtobýs parkin jańartýǵa kóńil bólip keledi.
Satybaldy SÁÝIRBAI, Aqtóbe oblysy.
68 000 000 “Avrora Agro” sharýa qojalyǵyndaǵy jaqsy bastamaǵa osynshama teńgeniń ınvestısııasy tartylǵan. О́ńir halqyn azyq-túlikpen qamtamasyz etý jáne ekologııalyq jaǵynan sapaly ónim óndirý kún tártibine ótkir qoıylyp, nátıjesinde jylyjaılar qatary tolyǵýda. Osy oraıda Qarasaı aýdany, Eltaı selolyq okrýgindegi “Avrora Agro” sharýa qojalyǵy budan birer jyl buryn 9900 sharshy metr aýmaqtyń bir bóligine joba boıynsha 30 jylyjaı salyp, jumysyn bastaǵan edi. Bıylǵy aqpan aıynyń sońynda egilgen qııar, qyzanaq ónimderi maýsym aıynyń alǵashqy onkúndiginde tutynýshy dastarhanyna túspek. Sharýa qojalyǵy kún jylynǵan qazirgi kezde artyq kóshetterdi dalaǵa, jylyjaıdyń ekinshi bóligine kóshire egip, olardan ónim alýdy qońyr kúzge deıin jalǵastyrýdy kózdep otyr. Sharýashylyqtaǵy qat-qabat áreketterdi bastaý men damytýǵa 68 mln. teńge ınvestısııa tartylyp, qysqa merzimde atalǵan baǵyttardaǵy jumystardyń tııanaǵy keltirilipti. Qazir óndiristegi ónim kólemi 127,5 tonnany quraǵan. Munda 40-qa jýyq adam eńbek etip, ekologııalyq jaǵynan taza ónimderdi tutynýshyǵa usyný jalǵasýda.
Kúmisjan BAIJAN, Almaty oblysy.
