Prezıdent bastapqyda uıymdastyrylǵan beıbit sherýlerdiń múldem basqa arnaǵa burylyp ketkenin aıtty.
– Árıne, bastapqyda beıbit sherýler boldy. Muny bárimiz kórdik. Elimizdiń ár aımaǵynda azamattar alańǵa jınalyp, óz talaptaryn aıtty, tipti, narazylyqtaryn bildirdi. Shynyn aıtsaq, áýelde eshqandaı qıratý, qylmystyq áreketter bolǵan joq. Biraq, jaǵdaı keıin múldem basqa arnaǵa burylyp ketti. Arandatýshylar men qaraqshylar paıda boldy. Olardyń shynaıy maqsaty beıbit mıtıngige qatysý emes, bılikke shabýyl jasaý boldy.
Bir sózben aıtqanda, sońyna qaraı alańǵa naǵyz lańkester shyqty. Búlikshiler myńdaǵan qarý-jaraqty urlap ketti. Qazirgi ýaqytta polısııa olardy izdep jatyr. Ázirge túgeldeı tabylǵan joq. Buzaqylar sol qarýdan taǵy da adam atýy ábden múmkin. Sonda muny kim istedi degen suraq týady? Kim jasady? Beıbit sherýge shyqqandar ma? Shyn máninde, bul – kásibı qaraqshylardyń isi, – dedi Prezıdent.
Sondaı-aq Qasym Jomart Toqaev olardyń qaıdan paıda bolǵanyn jáne alańǵa shyqqandardyń bárin beıbit sherýshi dep aıtýǵa bolmaıtynyn atap ótti.
– Men osy suraqqa birneshe ret jaýap berdim. Munyń aldyn ala josparlanǵan áreket ekeni anyqtaldy. Arnaıy daıyndyqtan ótken qylmystyq toptar, lańkester oqıǵanyń bel ortasynda júrip, qaraqshylardy, quqyq buzýshylardy basqardy. Árıne, buzaqy toptardyń arasynda beıbit azamattar da boldy. Endi, olardy, lańkesterden, qaraqshylardan bólip alýymyz kerek. Bul – óte kúrdeli másele. Munyń bárin tergeý jumystary anyqtaıdy. Jalpy, myna nárseni durys túsinýimiz kerek. Alańǵa shyqqandardyń bárin túgel beıbit sherýshi dep aıtýǵa bolmaıdy. Bul eshqandaı aqylǵa syımaıtyn nárse. Kózi ashyq, ary taza adam mundaı jalǵan tujyrymǵa eshqashan senbeıdi, – dedi Memleket basshysy.
Sonymen qatar jaǵdaıdy kimder ýshyqtyrǵanyn da aıtty.
– Eń aldymen, lańkester jaǵdaıdy ýshyqtyrdy. Olardyń maqsaty – eldiń tutastyǵyn buzý, halyqty qorqytý. Al, beıbit sherýshiler solardyń qarmaǵyna tústi. Qazir sol kinásiz azamattardyń quqyǵyn qorǵaýymyz kerek. Men árbir is boıynsha muqııat tergeý júrgizý kerek dep aıttym. Adamdardyń quqyǵyn buzǵan tulǵalar jazaǵa tartylady. Biz buǵan qajetti sharanyń bárin qabyldaımyz. Esh kúmán bolmasyn, – dedi Qasym-Jomart Toqaev.
