«О́kinbeımin. Bul eshqandaı da ókindiretin sheshim emes. Kerisinshe durys sheshim boldy dep oılaımyn. О́ıtkeni, qarýly qaraqshylar Almatyny qıratyp, ózge qalalarǵa qaýip tóndirdi. Osy qarýly kontıngent bolmasa, lańkester basqa da qalalardy basyp alar edi. Qarýly shaıqastar Taldyqorǵanda, Tarazda, Shymkentte, Qyzylordada oryn aldy. Elordada lańkesterdiń daıyndyq jumystary baıqaldy, olar, tipti, Aqordaǵa shabýyl jasaýǵa daıyn boldy.
Keıbir bedeldi sarapshylardyń aıtýynsha, lańkester Qazaqstannyń basty eki qalasyn basyp alýdy josparlaǵan. Bul Sırııadaǵy ssenarııge uqsas jospar. Sol elde lańkester Damask pen Rakkany basyp alýǵa árekettengen edi.
Ujymdyq qaýipsizdik shart uıymynyń áskerleri bizdiń elde bir de bir oq atqan joq. Ony ashyq aıtý kerek. Olar tek negizgi strategııalyq nysandardy kúzetip turdy. Osy kezde bizdiń kúshtik qurylymdar iske kirisip, qarýly lańkesterge tosqaýyl qoıdy. Aramyzda tek tyǵyz baılanys pen úılesim boldy» dedi Prezıdent.
Sondaı-aq Memleket basshysy el ishinde aıtylyp júrgen «Pýtınge qaryz boldy» degen sózdiń bos áńgime ekenin tiline tıek etti.
«Al endi «Pýtınge qaryz bop qaldyq» degenge kelsek, bul – bos áńgime. Ony doǵarý kerek. Birinshiden, Ujymdyq qaýipsizdik týraly shart uıymynyń kontıngenti V.Pýtınniń nemese Reseıdiń jeke áskeri emes. Bul uıymnyń áskerı quramy oǵan múshe elderdiń bárine ortaq. Onda Reseıden bólek, Belarýs, Armenııa, Tájikstan jáne Qyrǵyzstannyń áskerı bólimderi bar. Qazaqstan da – osy uıymnyń tolyqqandy múshesi ári negizin qalaýshysy. Sondyqtan, bári – zańdy, qısyndy.
Reseıge kelsek, bul alpaýyt el óziniń geosaıası múddesin de qorǵady. Qazaqstannyń turaqtylyǵy Reseıge óte qajet. Muny durys túsinýimiz kerek. Qazaqstan men Reseı – strategııalyq seriktester. Aramyzda shynaıy dostyq pen ózara senim bolýy kerek. Basqa saıasat ustansaq, eki eldiń strategııalyq múddesine nuqsan keltiremiz. Jalpy, biz eshkimge eshteńe de qaryz emespiz. Qazaqstan – egemen memleket. Sondyqtan saıasatymyz da derbes», dedi Prezıdent óz oıyn túıindep.
