Basty nazar «Qasiretti qańtar» oqıǵasyna aýdaryldy. Sondaı-aq elimizde saıası reformalar qashan jáne qandaı baǵytta bolatyny jaıly aıtyldy. Qazaqstan qoǵamynyń qajettilikteriniń biri osy caıası reformalardy iske asyrý ekeni jasyryn emes. О́ıtkeni kez kelgen qoǵamnyń kóńil kúıiniń qandaı bolatyny saıası ınstıtýttar qyzmetine tikeleı baılanysty.
Elimizdegi saıası organdardyń jumysyna biraýyzdan «nashar» degen baǵa berýge bolmas. Sebebi memlekettik apparat jumys istep jatyr, sońǵy jyldary birqatar saıası reforma júzege asty. Atap aıtar bolsaq, aýyl ákimderiniń saılaýy, saıası partııalardyń Májiliske ótý shegin 7-den 5 paıyzǵa deıin tómendetý, saıası bıýlletenderge «bárine qarsymyn» degen jazýdy engizý, áıelder men jastarǵa mindetti túrde 30 paıyzdyq kvotany saılaý tizimderinde berý qamtylǵan «Saıası partııalar týraly», «Saılaý týraly», «Parlament jáne onyń depýtattarynyń mártebesi týraly» zańdarǵa ózgerister engizildi.
Alaıda memlekettik ınstıtýttardyń atqaryp jatqan jumysyn ashyq aıtyp, halyqqa túsindirý isi aqsap tur, ıaǵnı kommýnıkasııa jetispeıdi. «Halyq únine qulaq asatyn memleket» tujyrymdamasynyń paıda bolýy da osy sebepten.
Halyqty alańdatqan máseleler qandaı sapada, qalaı sheshilip jatyr? Qoǵam osy suraqtarǵa tolyq jaýap alýy kerek. Memlekettik apparattyń ashyq bolýy da osyǵan kelip saıady. Qoǵam men bılik qatar júrýi kerek. Keıde memlekettik organdar óz qyzmetin, qabyldaǵan sheshimderin, keıbir áreketterin túsindirýge tyryspaıdy. Osydan narazylyq týyndaıdy.
Osy oraıda Prezıdent suhbat barysynda elimiz úshin jańa reformalardy kóp kúttirmeı Naýryz aıynyń ortasyna qaraı jarııalaıtynyn jetkizdi. «Men bastapqyda jańa saıası reformalardy kúzde jarııalaımyn dep oılaǵam, biraq saıası reformalardy naýryzdyń ortasynda halyqqa Joldaýymda usynatyn boldym. Qazirgi tańda jurt reformalardy zor úmitpen kútip otyrǵanyn bilemin. Sondyqtan «Jańa Qazaqstandy birge quraıyq» dep úndeý joldadym. Onda aıtylǵan máselelerdi kópshilik qoldap otyr», dedi Memleket basshysy.
Bul sózi arqyly Prezıdent búginde qoǵamnyń úlken ózgeristerdi asyǵa kútip otyrǵanyn jaqsy túsinetinin anyq ańǵartty. Aldaǵy ýaqytta Memleket basshysy tarapynan jasalatyn júıeli qadamdar halyqtyń kóńilinen shyǵady dep oılaımyn.
Indıra RYSTINA,
saıasattanýshy
