Jup quraǵandar jutynyp tur

Qazaqstannyń birinshi raketkasy Aleksandr Býblık Qatar astanasy – Dohadaǵy ATP 250 dodasyn sátti bas­taǵanymen, ekinshi aınalymda ekpinin joǵaltyp aldy. Jerlesimiz týrnırdiń jekeleı básekesindegi al­ǵash­qy kezdesýin álemdik reıtıngte 183-orynda turǵan slo­vakııalyq Iozef Kovalıkpen ótkizip, eki sette (6:2, 6:4 ese­bimen) basym tústi. I.Kovalık osy týrnırdiń irikteý keze­ńinde taǵy bir qazaqstandyq Andreı Golýbevpen kúsh synasyp, otandasymyzdy eki sette (6:4, 7:6) jeńip ketken bolatyn. Osylaısha Býblık Andreıdiń esesin qaıtardy desek te bolady.

Degenmen, jýyrda ǵana Monpeledegi (Fransııa) ATP 250 týrnırinde top jarǵan Aleksandr Býblık bul joly alysqa shaba almady. Ekinshi aınalymda reıtıngte ózinen 30 oryn tómen ornalasqan fransııalyq Artýr Rınderknehpen sheberlik baıqasty. Tartysty ótken kezdesýdiń alǵashqy partııasyn 7:6 esebimen jerlesimiz óz paıdasyna jazǵanymen, keıingi eki sette Rınderkneh Býblıkti bet qaratqan joq. Ekinshi sette fransııalyq tennısshi 6:1 esebimen tarazy basyn teńestirse, sheshýshi sette 6:4 esebimen jeńiske jetti. Sóıtip Artýr Rınderkneh jarystyń shırek fınalyna joldama aldy.

Endi Aleksandr Býblık osy jarystyń juptyq báse­kesindegi joryǵyn jalǵastyrady. Bul synda ol majar­standyq Marton Fýkovıchpen birge jup qurap, birinshi aınalymda Dodıg-Vınýs jubyn 7:6, 6:3 esebimen jeńdi. Býblık pen Fýkovıch juby ekinshi aınalymda Andreı Golýbev pen fransııalyq Fabrıs Martenmen oınaıdy. Bul básekede qaı jup jeńse de, qazaqstandyqtardyń bireýi jalpy júlde qory 1 mln AQSh dollarynan asatyn jarystyń jartylaı fınalyna shyǵady.

Golýbev-Marten bastapqy oıynyn ulybrıtanııalyqtar Denıel Evans – Ken Skýpskımen ótkizdi. Qazaqstandyq-fransııalyq jup birinshi partııada breık jasap, basym tústi – 6:4. Olar ekinshi sette de sol qarqynyn joǵaltqan joq – 6:4. Bir saǵattan sál astam ýaqytqa sozylǵan kezdesýde A.Golýbev pen F.Marten 3 eıs jasap, 7 breıktiń ekeýin óz esepterine jazdy. Qarsylastary bir ǵana eıs jasap, 4 breık-poıntty paıdalana alǵan joq.

Sonymen qatar taǵy bir qazaqstandyq tennısshi halyq­aralyq týrnırge qatysýda. Aleksandr Nedovesov Florı­da shtatynyń Delreı-Bıch qalasynda ótip jatqan ATP týrnırin sátti bastady. Ol pákistandyq Aısam-ýl-Hak Kýreshımen jup qurap, alǵashqy aınalymda amerıkalyq Blýmberg-Pol dýetin úsh sette (7:5, 6:7, 10:8 esebimen) jeń­di. Endi Nedovesov pen Kýreshı shırek fınalda AQSh sportshylary – Nıkolas Monro/Djekson Ýıtroýmen jartylaı fınaldyń joldamasyn sarapqa salady.