22 jastaǵy jerlesimizdiń bıyl Reseı birinshiliginde óner kórsetetini buǵan deıin belgili bolǵanymen, «Zenıt» otandasymyzdy tek kúni keshe ǵana jankúıerlerge resmı túrde tanystyrdy. Aqtaý fýtbol mektebiniń túlegi sanalatyn Nuraly Álip 2015 jyly «Qaırat» akademııasyna qabyldanyp, 2018 jyldan beri klýbtyń negizgi quramynda oınap keldi.
Osy ýaqyt aralyǵynda ol «Qaırat» jeıdesimen 99 kezdesýde alańǵa shyǵyp, 5 gol jáne 4 nátıjeli pasty óz enshisine jazdy. Almatylyq klýbpen birge ol 2020 jyly Qazaqstan chempıonatynda top jaryp, eki márte (2018, 2021) Qazaqstan kýbogyn jeńip aldy. Sondaı-aq 2018 jáne 2019 jyldary el birinshiliginiń kúmis júldegeri atandy. Al Qazaqstan quramasy sapynda 12 kezdesý ótkizdi.
Reseılik komanda otandasymyzdy satyp alý quqyǵy boıynsha bir jylǵa jalǵa aldy. Álip «Zenıt» sapynda 28 nómirmen óner kórsetedi. Aıta keteıik, qazaqstandyq qorǵaýshy «Zenıttiń» qysqy maýsymdaǵy eki birdeı oqý-jattyǵý jıynyna shaqyrtý alyp, joldastyq kezdesýlerde danııalyq «Mıtıýlland» jáne «Brondbıý» klýbtarynyń qaqpasyna gol soqty.
