Solardyń alǵashqysy – №81 Astana English school mamandandyrylǵan gımnazııa janynan qurylǵan qazaq tili bastaýysh uıymy.
Búgin Qoǵam músheleri atalǵan bilim ordasynyń qazaq tili men ádebıeti páni muǵalimderimen bas qosyp, ana tilimizdiń qoldaný aıasyn keńeıtý, mártebesin bıiktetý, qoǵamda tildi úırenýge degen qyzyǵýshylyqty arttyrý isindegi naqty máselelerdi talqylady. Álemde taralý boıynsha birinshi orynda turǵan aǵylshyn tiliniń muǵalimderi de qazaq tilin damytýǵa, keleshekte qoldanys aıasyn keńeıtýge jáne tanymaldyǵyn arttyrý boıynsha usynystaryn jetkizdi.
Jıynǵa qatysqan Qoǵamnyń astanalyq fılıaly tóraǵasynyń orynbasary Larısa Aldabergen bastaýysh uıymdy qurýda tańdaý nelikten atalǵan gımnazııaǵa túskenin aıtty.
«№81 Astana English school mamandandyrylǵan gımnazııa til úıretý isinde baı tájirıbege ıe belsendi ujym. Búgin mekteptiń qazaq tilin óskeleń urpaq boıyna sińirýge, ana tiliniń tanymaldyǵyn aǵylshyn tili deńgeıine kóterýge is júzinde áreket etip jatqanyna kózimiz jetip otyr. Usynysymyzǵa qoldaý bildirgen gımnazııa dırektory Gúlnár Dinqýatqyzy men ujymdy mekteptiń halyqaralyq statýs alýymen quttyqtaımyn», dedi Larısa Aldabergen.
Sondaı-aq, ol osy formattaǵy basqosýlar qazaq tili muǵalimderiniń tildi meńgertýge degen qulshynysyn arttyratynyn jáne ana tilin dáripteýge, jarnamalaýǵa, mártebesin arttyrý men qordalanǵan máselelerdi sheshý úshin klýb quryp, aıyna bir ret basqosý ótkizýdiń mańyzdylyǵyn atap ótti.
Jıyn qorytyndysynda bastaýysh uıymnyń 10 múshesi bekitilip, aldaǵy 9 aıda atqarylatyn jumystar nátıjesinde (mektepte eksperıment jasap kórip) arnaıy jobalar jasaýǵa sheshim qabyldandy.
«Halyqaralyq «Qazaq tili» qoǵamy» qoǵamdyq birlestigi - Qazaqstan Respýblıkasynyń memlekettik tili – qazaq tiliniń qoǵamnyń barlyq salasynda qoldanylýyna, damýyna yntaly, elimizde jáne shetelderde turatyn azamattardyń basyn biriktiretin erikti uıymǵa múshe bolǵanyma óte qýanyshtymyn! Alǵa qoıǵan maqsatymyzǵa jetýge atsalysyp, tilimizdiń mereıin asqaqtata bereıik!», deıdi №81 Astana English school mamandandyrylǵan gımnazııasynyń muǵalimi Indıra Darabaıqyzy.
