«Prezıdentimizdiń «Qazaqstan» ulttyq telearnasyna bergen suhbatyn kórip shyqtyq. Memleket basshysy suhbat barysynda halqymyzdy mazalaǵan ózekti máselelerge toqtalyp, elimizdiń damýy men bolashaǵy týraly oılaryn bildirdi.
Qasym-Jomart Kemeluly qańtar oqıǵasynan keıin elimizde qalyptasqan jaǵdaıǵa keńinen toqtalyp ótti. Qazir qoǵamda ustalǵandarǵa qatysty quqyq buzýshylyq derekteri týraly jıi aıtylyp jatqany belgili. Memleket basshysy bul máseleler boıynsha birneshe ret jıyn ótkizip, naqty tapsyrmalar berdi. Búgingi suhbatynda da azamattarymyzdyń quqyǵyn qorǵaý jáne árbir is boıynsha ádil sheshim shyǵarý asa mańyzdy ekenin atap ótti. Prezıdentimiz aıtqandaı, azamattardyń quqyǵyn buzǵandar jazasyz qalmaıdy.
Qazirgi tańda elimizde barlyq salada júıeli reformalar júrgizilip keledi. Qasym-Jomart Kemeluly mundaǵy basty maqsat eldiń ál-aýqatyn arttyrý, ádiletti qoǵam qurý, olıgopolııany joıý, saıası transformasııa jasaý jáne elimizdiń ekonomıkalyq damýyn jedeldetý ekenine basa mán berdi. Bul – halyqtyń talap-tilegi.
Memleket basshysy tóńkerisshiler osy reformalarǵa kedergi keltirip, elimizdiń irgesine syzat túsirýdi kózdegenin aıtty. Mundaı qıyndyqtar reformalardy shekteýge emes, kerisinshe olardy qarqyndy júrgizýge sebep bolady dep senemiz. Suhbattan Prezıdentimizdiń osyndaı qaǵıdaǵa arqa súıep otyrǵanyn baıqaý qıyn emes.
Sonymen qatar suhbatta qoǵamǵa mańyzdy ıdeologııalyq messedjder de nazardan tys qalǵan joq. Biz búginde Jańa Qazaqstandy quramyz degen jospardyń aıasyna toptastyq. Árıne, bul jospar ózdiginen júzege aspaıtyny túsinikti. Jańa Qazaqstannyń qozǵaýshy kúshi – bizdiń azamattarymyz, olardyń Otanǵa degen adaldyǵy, eńbekqorlyǵy men biliktiligi.
Jańa Qazaqstan – jańa mindet, ortaq murat. Oǵan qol jetkizý úshin árbir azamat óz salasynda sapaly eńbek etýge tıis. Qazir elimizdiń táýelsizdigi men memlekettiligin saqtap, ári qaraı nyǵaıtý – eń basty mindet.
Prezıdentimiz aıtqandaı, qazaqstandyqtardyń Qazaqstannan basqa Otany joq. Osy ortaq Otanymyzdy odan ári damytý jáne jańartý jolynda barshamyzdyń judyryqtaı jumylyp áreket etýimiz asa mańyzdy.
Sondyqtan qurmetti dostar, eldiń bereke-birligin saqtap, sabyrlyq pen jaýapkershilikke taban tirep, baısaldylyq tanytyp, bar máseleni baıyppen sheshýge kúsh jumsaýymyz qajet. Osy jolda bárimiz Prezıdentimizdiń saıasatyn qoldap, Jańa Qazaqstandy qurýǵa belsendi atsalysaıyq», delingen Senat Tóraǵasynyń jelidegi jazbasynda.
