Aldaǵy 29-30 sáýir kúnderi Almatyda Qazaqstan onkologtary men radıologtarynyń V sezi ótpek. Elimizdiń shalǵaı aımaqtary men shetelden keletin 500 jetekshi maman onkologııanyń múmkindikteri men damý máselelerin talqylaıdy. «13 jyldyq úzilisten soń ótkiziletin bul konferensııa – otandyq mamandar úshin asa mańyzdy bolmaq. Eń aldymen, kóbimizdiń alǵashqy eńbek jolymyz bastalǵan aýdan ortalyqtary men oblystardaǵy mamandardy jınaýdy maqsat etip otyrmyz», – deıdi Qazaq onkologııa jáne radıologııa ǴZI dırektory Qýanysh Nurǵazıev.
Sezde qaterli isikti alǵashqy satysynda anyqtaý tásilderi men ony emdeý, sondaı-aq, jıyrma birinshi ǵasyrdyń basty dertimen kúresýdegi medısına jetistikteri týraly aıtylyp, mamandar ózara pikir almasady.
Konferensııada jilik maıyn aýystyrýdyń jańa múmkindikteri, sońǵy úlgidegi apparattarmen jabdyqtaý jáne sáýleli, hımııalyq, gormondyq terapııadaǵy jańa ádister, qaterli isikti alǵashqy satysynda anyqtaýdyń skrınıngtik baǵdarlamalary, ortaq ǵylymı zertteýler men mamandar biliktiligin arttyrý maqsatynda olardy shetelge oqýǵa jiberý, naýqasqa pallıatıvtik (psıhologııalyq) kómek kórsetý jáne saýyqtyrý medısınasyn damytý, halyqtyń onkologııalyq saýatyn kóterý ári dárigerler biliktiligin arttyrý sııaqty eń ózekti taqyryptar talqylanatyn bolady.
Qýanysh Nurǵazıevtiń aıtýynsha, naýqastarǵa pallıatıvtik kómek kórsetýdi damytý – konferensııa kún tártibindegi negizgi máselelerdiń biri. «Keńes zamanynan beri naýqasqa psıhologııalyq jáe rýhanı kómek berý jaǵy aqsap keledi. Al qazirgi kezde saýyqtyrý men pallıatıvtik kómek júıesi bir izge túsip, damý ústinde. 2013 jyldan bastap árbir onkologııalyq dıspanserlerde dáriger-psıhologtardyń jeke bólimsheleri ashylyp, onkologııalyq dertke shaldyqqan jandarǵa kómektesetin áleýmettik jumysshylar toby quryldy».
Atalǵan sezde TMD elderi assosıasııasynyń prezıdenti Mıhaıl Davydov, Qaterli isikpen kúres halyqaralyq odaǵynyń prezıdenti Franko Kavallı jáne AQSh, Japonııa, Ońtústik Koreıa, Izraıl elderinen bilikti ǵalymdar keledi dep josparlanyp otyr.
Konferensııa QR Densaýlyq saqtaý mınıstrliginiń, Qazaq onkologtary men radıologtarynyń ǵylymı zertteý ınstıtýty jáne «Qazaqstan onkologtary men radıologtary» qoǵamdyq birlestiginiń qoldaýymen ótedi.
Qazaqstandyqtardyń ómir súrý jasyn uzartý men ómir sapasyn arttyrý maqsatynda 2012-2016 jyldarǵa arnalǵan onkologııalyq kómek kórsetýdi damytýdyń tórtjyldyq memlekettik baǵdarlamasy qabyldandy. Oǵan bıýdjetten 211 mıllıard teńge bólingen. Qazirgi tańda QR Densaýlyq saqtaý mınıstrligi jatyr moıny qaterli isigi, sút bezi qaterli isigi, qýyqasty bezdiń qaterli isigi, óńesh jáne asqazan, baýyr qaterli isigi, oǵan qosa, qaterli isikti alǵashqy satysynda anyqtaý men ony tolyq emdeý jáne ólim kórsetkishin azaıtýǵa baǵyttalǵan alty skrınıngtik baǵdarlamany iske qosty.
Aınash ESALI,
«Egemen Qazaqstan».
ALMATY.
