Infraqurylymdyq jobalar qory qurylady

Premer-Mınıstr Serik Ahmetov ótken aıdyń basynda ınfraqurylymdyq jobalar qoryn qurýdy jedeldetý týraly tapsyrma bergeni málim. Osyǵan oraı, «Báıterek» ulttyq basqarýshy holdınginiń taıaýda bolǵan dırektorlar keńesiniń alǵashqy jıynynda atalǵan qordy qurý jóninde sheshim qabyldandy. Osy maqsatty júzege asyrý úshin «Báıterek» holdınginiń jarǵylyq kapıtaly bıýdjettik qarjy esebinen 20 mlrd. 330 mln. 779 myń teńgege  ulǵaıtyldy. Bul qarjynyń negizgi bóligi holdıngtiń enshiles mekemesi – «Qazyna kapıtal menedjment» AQ-tyń qarjylyq kapıtalyna qosyldy. Endi ol qarjy Infraqurylymdyq jobalar qoryn qurýǵa jumsalady. Qordyń maqsaty, ınfraqurylymdyq jobalarǵa ınvestısııa tartyp, osy baǵyttaǵy jumystardy jandandyrý bolyp otyr.  Qalǵan  330 mln. 779 myń teńge «Tehnologııalyq damý jónindegi ulttyq agenttik» AQ-yna aspap jasaý jónindegi konstrýktorlyq bıýro qurý úshin berilmek eken. Munymen qatar, «Báıterek» ulttyq basqarýshy  holdıngi men «Qazaqstandyq memlekettik – jeke áriptestik ortaly­ǵy» birlesip,   «Memlekettik – jeke áriptestik jobalaryn súıemeldeý» JShS qurmaq kórinedi. Onyń negizgi jumysy ınfraqurylymdyq, sonyń ishinde memlekettik – jeke áriptestik negizinde júzege asyrylatyn jobalardy qurylymdap, odan keıin súıemeldeýge baǵyttalady eken. Ortalyqtyń aldyn ala kelisimnen ótken jobalarynyń qatarynda Almaty stansasyn aınalyp ótetin  temirjol bar. Sondaı-aq, Almaty jáne Qaraǵandy qalalarynda salynatyn 300 tósektik kópsalaly aýrýhanalar qurylysy da alǵy lekte tur. Memlekettik – jeke áriptestik jobalardy súıemeldeý ortalyǵynyń jarǵylyq kapıtaly 200 mln. teńge kóleminde belgilengen. Onyń 150 mln. teńgesi, ıaǵnı 75 paıyzy «Báıterek» holdınginiń úlesine beriledi. «Qazaqstandyq memlekettik – jeke áriptestik ortalyǵy» AQ-tyń úlesi 50 mln. teńge, ıaǵnı jalpy somanyń 25 paıyzyn quraıdy. Dırektorlar keńesi holdıngtiń 2014-2023 jyldarǵa arnalǵan damý strategııasyn da bekitti. Qujatta holdıngti ıntegrasııalanǵan damý ınstıtýty retinde qalyptastyrýǵa baılanysty mindetter men taıaý onjyldyqtaǵy strategııalyq baǵyttar aıqyndalǵan. Birinshi kezektegi mindetter – qarjylyq jáne óndiristik jumystardyń shyǵynsyz júrgizilýin qamtamasyz etý sharasy men qarjy resýrstaryn basqarýdyń tıimdiligin arttyrý. Munymen birge, holdıng jumysynyń jarııalylyǵyn qamtamasyz etip, halyqtyń senimin nyǵaıtý jóninde jumystar júrgizilmek. Otyrysta holdıng quramyndaǵy enshiles mekemeler aktıvteriniń quryly­myn ońtaılandyrý máselesi de talqylandy. Saraptamalarǵa zer salsaq, holdıng qurylymynda profıldi emes aktıvter joq. Degenmen, birqatar enshiles kompanııalar ınvestısııalyq qorlarǵa nemese ınvestısııalyq joba­lar­dy júzege asyrýǵa qatysyp kelgen. Osyǵan oraı, jyl sońyna deıin «Damý» kásipkerlikti qoldaý qory 5 mıkro­kredıttik uıymnan shyǵady. «Tehnologııalyq damý jónindegi ulttyq agenttik» AQ tehnoparkter jumysyn ońtaılandyrý maqsatynda Almaty aımaq­tyq tehnoparki men Sátbaev atyn­daǵy Qazaq ulttyq tehnıkalyq ýnıver­sıtetiniń tehnoparkin biriktirý baǵytynda jumysyn jalǵastyra beredi. Nurbaı ELMURATOV, «Egemen Qazaqstan».