Ákimdikte ótken onlaın brıfıngte Nur-Sultan qalasynyń Halyqty jumyspen qamtý ortalyǵynyń dırektory Azamat Baıtasov 2021 jylǵy jumys qorytyndylary týraly aıtyp berdi.
Máselen, ótken jyly «Eńbek» memlekettik baǵdarlamasy sheńberinde jumyspen qamtýǵa járdemdesý sharalarymen 23 240 adam qamtyldy. Onyń ishinde turaqty jumys oryndaryna 7 212 adam, JQJK jobalaryna 260 adam jumysqa ornalastyryldy, jastar tájirıbesine 914 adam qatysty. Sonymen qatar, áleýmettik jumys oryndarymen 185 adam, qoǵamdyq jumystarmen 2 848 adam qamtamasyz etildi, «birinshi jumys orny» jobasyna 91 adam, «Urpaqtar kelisimsharty» jobasyna 2 adam qatysty, 200-den astam qala turǵyny qysqa merzimdi kásiptik kýrstardan ótti.
Sondaı-aq, «Bastaý Bıznes» sheńberinde oqýǵa 1 384 adam jiberildi, olardyń 503-i memlekettik granttarǵa ilikti. Kásipkerlik bastamalardy qoldaý sheńberinde 92 nesıe berildi, saýda, tamaq jáne tigin ónerkásibi salalarynda 590 bıznes-joba qoldaý taýyp, tólendi.
Jumyspen qamtýdyń jol kartasy aıasynda 2021 jyly 14 ınfraqurylymdyq joba iske asyrylyp, 635 jumys orny quryldy. Sonymen qatar, ótken jyly elordada 28 myńnan astam jumys orny ashyldy, onyń 24 myńy - turaqty jumys oryndary.
Bıyl 28,5 myń jumys ornyn uıymdastyrý josparlanýda.
