Týrızm salasynyń máseleleri talqylandy

Jıynda birinshi bolyp sóz alǵan Premer-Mınıstrdiń orynbasary Eraly Toǵjanov búgingi tańda eldegi týrızmdi damytý áleýmettik-ekonomıkalyq turǵydan budan ári damýymyzda mańyzdy oryn alatynyn aıtty. Ol – ekonomıkanyń damýy ǵana emes, halyqtyń tabysyn arttyrýdyń negizgi baǵyttarynyń biri, óıtkeni bul sala jumys oryndary­men de tikeleı baılanysty eke­nin jetkizdi. Sondaı-aq Premer-Mı­nıstrdiń orynbasary búginde durys uıymdastyrylǵan memleket­tik saıasat pen týrıstik qaýymdas­tyqtyń úılesimdi ózara is-qımyly arqyly salany júıeli damytý qamtamasyz etilip kele jatqanyn da tilge tıek etti.

– Shynyn aıtý kerek, munyń bári ózinen ózi ońaı jasala qoıǵan joq. Osy ýaqytqa deıin túrli ke­der­gilerden óttik. Pandemııaǵa baılanysty birqatar qıyndyqqa da tap boldyq. Bul baǵytta áli de naqty jumystar istelýi kerek. Degenmen jos­parlanǵan biraz dúnıe júzege asyrylǵanyn ózderińiz bilesizder. Nátı­jesinde, 2021 jyly týrızm salasyndaǵy negizgi kapıtalǵa salyn­ǵan ınvestısııa kólemi 564 mlrd teńgeni qurady. Qıyn kezeńderdi eskere otyryp basqa memlekettermen salystyryp qarasaq, bul táp-táýir kórsetkish dep aıtýǵa bolady. Ári qaraı da bul baǵytty birge damytýymyz kerek, – dedi Premer-Mınıstrdiń orynbasary.

Al vedomstvo basshysy Dáýren Abaev mınıstrliktiń 2021 jyly atqarǵan jumysy jáne aldaǵy kezeńdegi negizgi mindetteri týraly esep berdi. Mınıstr búgingi tańda epıdemııalyq jaǵdaıǵa jáne qabyldanǵan karantındik sharalarǵa qaramastan, salada oń úrdister bar ekenine toqtaldy. Máselen, 2021 jyldyń 9 aıynyń qorytyndysy boıynsha ishki týrıster sany 5,2 mln adamdy qurap, 2019 jyldyń karantınge deıingi kórsetkishinen 100 myń adamǵa artqan.

Sonymen qatar D.Abaev el Pre­zıdenti Qasym-Jomart Toqaevtyń týrızm salasyn memlekettik saıa­sattyń perıferııasynan shyǵaryp, ony eldiń ekonomıkalyq ósý draı­verleriniń birine aınaldyrý baǵytynda naqty mindet qoıǵanyn aıtty. Is-sharada mınıstrlik belsendi jumys júrgizetin 8 basym baǵyt atap ótildi. Olar: týrıstik bıznesti qoldaý, otbasylyq demalystyń qol­jetimdiligine baǵyttalǵan áleýmettik bastamalar, mektep týrızmin damytý, jańa týrıstik baǵyttardy ázirleý jáne engizý, kelý týrızmin yntalandyrý, eko jáne agrotýrızmdi damytý, týrıstik áleýetti nyǵaıtý úshin kreatıvti ındýstrııalardy iske qosý boıynsha sharalardy daıyndaý.

D.Abaev balalar demalysyn damytýǵa basa nazar aýdarýdy tapsyrdy.

– О́tken jyly biz balalar men jasóspirimder týrızmi nysandaryn araladyq. Respýblıka boıynsha 202 balalar lageri bar ekeni anyqtaldy. Alaıda olardyń úshten biri 1952-1990 jyldar aralyǵynda salynǵan. Kópshiliginde materıaldyq-tehnı­kalyq baza eskirgen. Osyǵan baılanysty týrızm salasyna jetekshilik etetin vıse-mınıstrge jáne Kazakh Tourism-ge balalar-jasóspirimder jáne saýyqtyrý týrızmin damytý jóninde sharalar keshenin ázirleýdi tapsyramyn. Eger qajet bolsa, biz tıisti baǵdarlamany qabyldaýǵa da­ıynbyz, – dedi mınıstr.

Kazakh Tourism ulttyq kompa­nııa­synyń basqarma tóraǵasy Talǵat Amanbaev keıingi úsh jylda, ıaǵnı 2019-2021 jyldary elimizde birqatar mańyzdy joba atqarylǵanyn málimdedi. Jumystardyń basym bóligi Mańǵystaý, Shýchınsk – Býrabaı, Túrkistan jáne Almaty men Shy­ǵys Qazaqstan oblystarynyń aýma­ǵyndaǵy Alakól kýrorttyq aımaq­taryn damytýǵa baǵyttalǵan.

– Elimizge kelgen týrısterge biz árqashan sapaly qyzmet kórsetýimiz kerek. Sondyqtan byltyr qazaqstandyq týroperator qyzmetkerleriniń biliktiligin arttyrý maqsatynda onlaın sabaq júrgizdik. Oǵan elimizdiń ár oblysynan 3 myńnan asa adam qatysty. Onyń ishinde aýyldyq jerdegi 428 turǵyn týrısterge qyzmet kórsetýge nıetti ekendikterin baıqatty. Sondaı-aq arnaıy «Sapa belgisi» degen baǵ­dar­lama engizip, balalar týrızmi, qala týrızmi, agrotýrızm jáne Jibek joly týrızmi baǵyty boıynsha
3 300 týrıstik nysandy zerttep, jańa týrıstik ónimderdi damytý boıynsha usynystar daıyndadyq, – dedi T.Amanbaev

Júrgizilgen jumystardyń nátı­jesinde byltyr Qazaqstan Lone­ly Planet jahandyq baspasynyń nus­qasy boıynsha «Úzdik qonaqúı» nomı­nasııasyn jeńip aldy. Al Le Figaro atty fransııalyq basylym Qazaq­standy 2021 jyly barýǵa usy­nylǵan 21 el tizimine qos­ty. The Telegraph Qazaqstandy «Qar­qyndy damyp kele jatqan týrıstik destınasııa» retinde atap ótti.

Qazaqstannyń Travelstan jar­na­malyq rolıgi Portýgalııada ótken 14th ART&TUR – International Tou­rism Film Festival festıvalinde «Úz­dik rolık» nomınasııasyn ıelense, Almaty oblysyndaǵy «Kólsaı kólderi» ulttyq tabıǵı parki men Saty kenti álemdik aýyl týrızminiń «Oskaryna» ıe boldy.