Jýyrda oblys ákimi Q.Aqsaqalov Nur Otan partııasy oblystyq fılıalynyń tóraǵasy retinde turǵyndarmen kezdeskende osy másele aldynan shyǵyp, aýyldyqtar Presnov toptyq sý qubyryna osy aýyldar qashan kiredi dep surady. Sóıtse bul jobany iske asyrý úshin 2 mlrd teńge qarajat kerek eken. Ondaı qarajat bolmaǵan soń aýyl turǵyndary taza aýyz sýǵa qol jetkize almaıdy. Kezdesýge qatysqan oblystyq energetıka jáne turǵyn-úı kommýnaldyq sharýashylyǵynyń basshysy Pavel Shılov jobanyń ortalyq memlekettik organdarǵa jiberiletinin aıtty. «2023 jyldyń naýryz aıyna qaraı biz qarajatqa tapsyrys beremiz», dedi ol.
JSQ daıyn bolsa, nege osy ýaqytqa deıin onyń ortalyq memlekettik organdardyń qaraýyna berilmeı jatqany túsiniksiz. Osynyń ózinen sylbyrlyq kórinip tur. Taza aýyz sý máselesin sheshý – basym jobalar bolý kerektigi jóninde Memleket basshysy talaı aıtqanymen júriske shaban sheneýnikter bárin de erteńge ysyra beretin sekildi...
Sonymen qatar oblys ákimimen kezdesýge kelgender Sergeevka qalasynyń ishindegi joldardyń sapasyzdyǵy týraly aıtty. Aýdan ortalyǵy sanalatyn shaǵyn qalaǵa kireberis joldardyń ózi jaırap jatyr. Tek byltyr ǵana jeti shaqyrymdyq jol jóndelgen. Al birneshe basty kósheniń joldaryn jóndeýge JSQ ázirlengenimen ol da uzyn arqan, keń tusaýmen áli kúnge iske aspaı turǵan kórinedi. Oblys ákimi Qumar Aqsaqalov bul máseleniń mánisi tereńde ekenin aıtty. «Qazir bizdiń aýyldardaǵy úlken jóndeý jumystary «Aýyl – el besigi» baǵdarlamasynyń sheńberinde iske asyrylýda. Al Sergeevka qalasy qala mártebesi bolǵan soń bul baǵdarlamaǵa kirmeıdi. Biraq másele sheshýsiz qalmaýy kerek. Oǵan «Aımaqtardyń damýy» baǵdarlamasynyń sheńberinde qarajat qarastyramyz. Biraq bir jylda JSQ-daǵy 4 mlrd teńgeni bir-aq bólemiz dep aıta almaımyn. Degenmen múmkin bolǵan jaǵdaıdy qarastyramyz», dep jaýap berdi.
Al jýyrda óńirge Májilis depýtattary kelip, sheshilmegen kóptegen problema baryna kóz jetkizdi. Máselen, depýtat Erlik Taıjanov oblysta kómir tapshylyǵyn sheshýge buryn atsalysqanyn baıandaı kelip Aıyrtaý aýdanyndaǵy bir top aýyldyń jer paıdalaný úlesinen aırylyp qalǵany týraly aıtty. «Men osy aýyldarǵa baryp, halyqpen kezdesip, osy problemany qalaı sheshý kerektigin zertteımin», dedi depýtat.
Halyq qysylǵanda qorǵanyshy bolyp tabylyp jatqan ákim-qaralar men depýtattardyń bolǵany da jaqsy-aý.
Soltústik Qazaqstan oblysy
