«Atameken» alańynda pikirtalastyń 4-5 raýndyn ótkizdik. Olardy Ekologııa, geologııa jáne tabıǵı resýrstar, Indýstrııa jáne ınfraqurylymdyq damý mınıstrlikteri, sarapshylyq qaýymdastyqtar uıymdastyrdy. Naǵyz sarapshylar, ótirik sarapshylar, avtoóndirýshiler, bári-bári qatysty. Árıne, pikir óte kóp. Elimizge sheteldik eski-qusqy kólikterdi kirgizý úshin ýtılalymdy múldem alyp tastaý máselesi de kóterildi. Otandyq mashına jasaý salasyna nuqsan keltirýge tyrysqandar da boldy», dedi Roman Sklıar «Habar-24» telearnasyndaǵy «Suhbat» baǵdarlamasy barysynda.
Sondaı-aq, ol ýtılalymǵa qatysty teńgerimdi sheshim qabyldanǵanyn atap ótti.
«Avtoónerkásipti yntalandyrý deńgeıi jalpy bizge kóliktiń barlyq túrine jáne qurastyrylatyn aýyl sharýashylyǵy tehnıkasyna kádege jaratý alymyn 50 paıyzǵa deıin tómendetýge múmkindik beredi», dedi birinshi vıse-premer.
Esterińizge sala ketsek, Memleket basshysy taıaýda Úkimettiń keńeıtilgen otyrysynda ýtılalym tóńiregindegi daýǵa qatysty pikir bildirgen bolatyn.
«Qazaqstanda halyqaralyq júk tasymalyna 7,5 myń tirkemeli kólikter jumys isteıdi. Reseıdiń halyqaralyq tasymalynda 34 myń, Belarýs elinde 15 myń, О́zbekstanda 8 myń kólik qatysýda. Otandyq kásiporyndar naryqta ornyn joǵaltýda.
Kórshilerimizden utylyp jatyrmyz degen sóz. 2017 jyldan beri otandyq tasymaldaýshylardyń halyqaralyq tasymal naryǵyndaǵy úlesi 1,5 eseden astam qysqarǵan. Sondyqtan, Úkimetke bul saladaǵy saıasatty jetildirý, onyń ishinde ýtılalym boıynsha usynys daıyndaý kerek», degen edi Memleket basshysy.
