Quzyrly mınıstrlik atalǵan máselege jiti kóńil bólip, onyń sheshilýine bilek sybana kiristi. О́ıtkeni, elde sportqa qabiletti 300 myńnan asa múmkindigi shekteýli jan bar. Biraq, olardyń 12,7 prosenti ǵana turaqty shuǵyldanady.
О́ńirler boıynsha Shyǵys Qazaqstan men Nur-Sultan qalasy belsendi. Qalǵan aımaqtardaǵy kórsetkish tómen. Endi olardy jappaı sportqa tartý úshin sporttyq nysandardyń qojetimdiligin arttyrý bastamasy qolǵa alyndy. Qazir elimizde 590 jabyq sporttyq keshen bar. Biraq, onyń 20 prosenti ǵana múgedekterdiń júrip-turýyna jáne emin-erkin jattyǵýyna qolaıly. Máselen, elordadaǵy «Saryarqa» velotregine 300-ge jýyq múmkindigi shekteýli jan kelip júr. Sonyń biri - Serikbaı Aýshanov. Temir jol salasynyń mamany 2005 jyly qyzmet barysynda qos aıaǵynan aıyrylyp, taǵdyr taýqymetine tap boldy. Biraq, oǵan moıymaı, sportpen shuǵyldana bastady. Búginge deıin parapaýerlıftıng, pnevmatıkalyq atý jáne qol kúresi baǵyttary boıynsha jarystarǵa qatysyp, tipti, birneshe ret el úzdigi atandy. Áli kúnge deıin jattyǵýdy úzgen joq. Sonyń arqasynda densaýlyǵyn birqalypty ustap, jurt qatarly ómir súrip júrmin deıdi keıipkerimiz.
«Bunda barlyq jaǵdaı qarastyrylǵan. Ǵımarat arbamen kirip-shyǵýǵa qolaıly. Múgedekterge arnalǵan lıft te bar. Fıtnes ortalyqta ta, basseınde de jattyǵýǵa bolady. Nusqaýshylar qajet kezde kómektesip, tipti, kásibı keńes te beredi. Mysaly, basseınge 2014 jyldan beri kelip júrmin. Alǵashqyda júze almaıtynmyn. Eki aıaǵym bolmaǵasyn aýdarylyp kete berem. Birinshi kúnderi basseındi jaǵalap, qolmen ustap júrdim. Birte-birte úırenisip, qazir erkin júzemin», deıdi Serikbaı Aýshanov.
«Nur-Sultan» olımpıadalyq daıarlaý ortalyǵyna qarasty «Saryarqa» fıtnes ortalyǵy tegin negizdegi qoldaýdy birneshe jyl buryn bastady. Qazirgi basshylyq jáne ortalyq mamandary endi osy jumystardy júıelep, ony odan saıyn damytýdyń joldaryn qarastyryp jatyr. Elimizdegi basqa sporttyq nysandar da aldaǵy birer jylda osyndaı deńgeıge jetip, tolyqtaı arnaıy talaptarǵa saı bolýy kerek.
«Bizge qazir júzdegen múmkindigi shekteýli jan kelip júr. Arnaıy uıymdarmen kelisimshartqa otyryp, usynǵan adamdaryn qajetti jaǵdaımen qamtamasyz etemiz. Budan bólek, jeke azamattar da kelip, ótinish tastaýyna bolady. Eshqandaı shekteý joq. Keıin qalaǵan ýaqytynda kelip, shynyǵa beredi. Tipti, qasyndaǵy kútýshisimen birge kire alady», deıdi fıtnes ortalyǵynyń jetekshisi Azamat Nurlanov.
Qazirdiń ózinde barlyq sporttyq nysanda 1-shi jáne 2-shi top múgedekteri tegin negizde daıyndala alady. Al, úshinshi toptaǵy azamattarǵa 50 prosent jeńildik qarastyrylǵan. Osy arqyly úıde otyrǵan jandardy barynsha sportqa tartý kózdelip otyr. Soǵan sáıkes, ishki básekelestik artyp, kásipqoı paralımpıadashylardyń shyǵýyna da múmkindik ashylady.
Aslan Qajenov,
«Nur-Sultan» olımpıadalyq daıarlaý ortalyǵynyń marketıng boıynsha ınspektory
