Atalǵan sharaǵa Májıt Begalınniń týystary – Gúlnár, Aıjan jáne Aıdar Begalınder, KSRO halyq ártisi, Qazaqstannyń Eńbek Eri, kınostýdııanyń kórkemdik jetekshisi Asanáli Áshimov, derekti kıno rejısseri Bolat Núsimbekov, sondaı-aq «Qazaqfılmniń» vıse-prezıdentteri Aıdarhan Ádilbaev pen Aıdar Batalov jáne basqalary qatysty.
Mádenı is-shara aldynda qonaqtar Májıt Begalınniń qujattary, jeke zattary, nagradalary, sýretteri men ózi túsirgen fılmniń posterleri saqtalǵan mekteptiń mýzeıin aralap, qyzyqty derektermen tanysty. Kınostýdııanyń vıse-prezıdenti Aıdar Batalov rejısserdiń esimin ulyqtap júrgen ustazdarǵa alǵysyn bildirip, mektep dırektory Aısulý Bota-evaǵa Sháken Aımanovtyń fılmderi toptastyrylǵan DVD jınaǵyn tartý etti.
Qazaq kıno óneriniń sańlaǵy Asanáli Áshimovti mektep oqýshylary erekshe qoshemetpen qarsy aldy. О́z sózinde tanymal akter osydan 10 jyl buryn mýzeıdiń ashylýyna qatysqanyn eske alyp, osyndaǵy jádigerler rejısserdiń inisi Qasym Begalınniń arqasynda jınalǵanyn aıtty.
– Májıt Begalın menen 15 jas úlken bolsa da, bir-birimizben ońaı til tabystyq. Májekeń maǵan kóp nárseni úıretti. О́te meıirimdi jáne bilimdi adam edi, tek qana shyndyqty aıtýǵa talpynatyn. Aramyzdan erte ketse de, qazaq kınosynyń tarıhynda óshpeıtin iz qaldyrdy, – dedi Asanáli Áshimov.
Ulttyq kınonyń irgetasyn qalap, qalyptasýy jolynda ólsheýsiz eńbek sińirgen Májıt Begalınniń esimin ıelenip otyrǵan mektep ujymy men onda bilim alatyn urpaq tulǵany qasterleý jolynda tynbaı izdeniste kele jatqanyn maqtanyshpen jetkizdi.
ALMATY
