«Eldiń energetıkalyq teńgeriminde jańa generasııa núktesi retinde qýaty 2,4 GVt bolatyn atom elektr stansasyn salý qarastyrylyp otyr», dedi Bolat Aqsholaqov.
Mınıstr Qazaqstanda AES salýdyń artyqshylyqtary men álemdegi atom energetıkasynyń naryǵy týraly málimetterge toqtaldy.
«Atom energetıkasynyń tarıhy jarty ǵasyrdan astam ýaqytty qamtıdy. Osy ýaqyt ishinde ol energetıkanyń dástúrli salalarynyń birine aınaldy. Qazir álemdegi 31 el atom elektr stansııalaryn paıdalanady. Osy jyldyń aqpan aıyndaǵy jaǵdaı boıynsha álemde shamamen 439 energııa reaktory, ıaǵnı jalpy qýaty shamamen 390 GVt bolatyn atom reaktory bar. 19 elde taǵy 52 reaktor salynyp jatyr. Atom energetıkasy búginde shamamen jahandaǵy búkil generasııanyń 10%-yn alady», dep túsindirdi vedomstvo basshysy.
Mınıstr Atom energııasy jónindegi halyqaralyq agenttik 2050 jylǵa qaraı AES generasııasy 1,8 ese ósedi dep boljaǵanyn atap ótti.
«Tabıǵı ýran óndirý boıynsha álemde birinshi orynda ekenimizdi aıta otyryp, ıadrolyq otyn óndirý boıynsha óz quramdastarymyz da bar. О́tken jyly Úlbi metallýrgııa zaýytynda atom elektr stansııasyna arnalǵan ıadrolyq otyn óndiretin zaýyt ashyldy. Kadrlyq áleýetke keletin bolsaq, jaqynda atom energetıkasy salasynda maman daıarlaý boıynsha memorandýmǵa qol qoıyldy. Stansııanyń qaýipsiz jáne senimdi jumys isteýi kóptegen kadrlardy qajet etedi. Biz eki energetıkalyq blogy bar bir stansııaǵa aýysymdyq jumysty eskere otyryp, shamamen 2 myń adam qajet bolady dep topshyladyq. Bul 2 myń adamdy tek oqytyp qana qoımaı, olardyń osy salada belgili bir jumys tájirıbesi bolýy kerek», dep túıindedi Bolat Aqsholaqov.
