Qazaqstandaǵy avtokólik satýdaǵy otandyq óndirýshilerdiń úlesi 65 paıyzdy quraıdy. Biz biletindeı, Qazaqstanda KIA, Chevrolet, Lada, Hyundai kólikteri shyǵarylady. Sońǵy derek boıynsha Qazaqstandaǵy 4,5 mln jeńil kóliktiń 2 452 906-sy – 10 jyldan artyq minilgen kólik.
2019 jyly – 75 myń, byltyr 93 myń jańa kólik saýdalansa, 2021 jyldyń qańtar-tamyz aılarynda 76 048 kólik aınalymǵa shyqty. Úles kóbeıip kele jatyr. Qazaqstandaǵy ýtılalym eki fýnksııany oryndap otyr. Bul – ekologııalyq jáne tarıftik fýnksııa. 2016 jyldan beri 200 myńnan astam avtokólik qaıta óńdeýge tapsyryldy. Iаǵnı halyq bul kólikter úshin aqshalaı nemese sertıfıkat túrinde ótemaqy aldy.
Qazir ýtılalym týraly pikir júıelengen joq. Eýropalyq odaqtaǵy ýtıl jınaǵynyń mólsherine jıi nazar aýdarylady. Biz Eýrazııalyq ekonomıkalyq odaq sheńberinde jumys isteımiz. Árıne, baǵany memleket belgilemeıdi, memleket tek jaǵdaı jasaıdy. Iаǵnı otandyq óndirýshiler kóliktiń qunyna qaıta óńdeý aqysyn qospaıdy. Úkimet jarııalaǵan taǵy bir mańyzdy shara – kólik alamyn deýshilerge bastapqy jarnasyz jeńildetilgen nesıe berýdi jetildirý. Baǵdarlamaǵa suranys bar jáne bul sátti júzege asýda. Biz qazirdiń ózinde nátıjelerin kórip otyrmyz. Qazir kólik alýǵa 15 myńǵa jýyq adam kezekte tur. Bul sharanyń halyqqa, qoǵamǵa paıdasy zor dep esepteımin.
Qaırat ELAMANOV,
Qazaqstan avtobıznes qaýymdastyǵynyń memlekettik organdarmen ózara áriptestik bóliminiń dırektory
