«Elimizde týberkýlezdiń aldyn alý, dıagnostıkalaý jáne emdeý tegin júrgiziledi. Qazaqstan bıýdjet qarajaty esebinen halyqaralyq standarttarǵa sáıkes týberkýlezdi erte dıagnostıkalaýdyń, emdeýdiń jáne aldyn alýdyń eń zamanaýı ádisterin engizgen sanaýly elderdiń qataryna jatady. Týberkýlezdi erte anyqtaý úshin DDU usynǵan jáne halyqaralyq standarttarǵa sáıkes keletin týberkýlezdi jáne dárige tózimdi týberkýlezdi bakterıologııalyq jáne molekýlıarlyq-genetıkalyq dıagnostıkalaýdyń jedeldetilgen ádisteri engizildi», dep atap ótti Ulttyq ftızıopýlmonologııa ǵylymı ortalyǵynyń dırektory.
Ol búginde aýrýdy tez dıagnostıkalaýǵa arnalǵan jabdyqpen barlyq aımaqtyq týberkýlezge qarsy mekemeler men aýdandyq deńgeıdegi zerthanalar (barlyǵy 128 xpertmtb/RIF apparattary) qamtamasyz etilgenin aıtty. Týberkýlez jaǵdaılarynyń 99,9%-y dıagnostıkanyń jańa jedel ádisiniń nátıjesinde anyqtalady.
«Elimizde týberkýlezben aýyratyn naýqastardy emdeýdiń tıimdiligi álemdegi eń joǵary kórsetkishterdiń biri. 2021 jyly sezimtal týberkýlezben alǵash anyqtalǵan naýqastar arasynda 87,5%-dy, al dárige tózimdi týberkýlez 82,5%-dy qurady, bul álemdik standarttarǵa sáıkes keledi», dep tolyqtyrdy M.Ádenov.
Onyń sózine qaraǵanda, mundaı kórsetkishterge týberkýlezdiń taralýyna jol bermeý jónindegi negizgi sharalardy kúsheıtý arqyly qol jetken. Ulttyq ftızıopýlmonologııa ǵylymı ortalyǵy aldyn alý jáne emdeýden basqa, qoǵamda naýqastardy kemsitpeýge qamqorlyq jasaıdy.
Sonymen qatar Ulttyq ftızopýlmonologııa ortalyǵynyń dırektory Dúnıejúzilik týberkýlezge qarsy kúres kúnine arnalǵan aılyq 24 aqpannan 24 naýryzǵa deıin jalǵasatynyn jetkizdi. Aılyq aıasynda ftızıatr, ftızıopedıatrlardyń tegin keńesteri, turǵyndardy flıýorografııalyq tekseristen ótkizý sııaqty aýqymdy aksııalar josparlanǵan.
«Pasıentterdiń emdelýge beıimdiligin arttyrý maqsatynda jergilikti atqarýshy organdar, úkimettik emes uıymdardyń kómegimen emdelýshilerdiń ambýlatorlyq satysyndaǵylarǵa psıho-áleýmettik qoldaý kórsetildi. Oǵan qosa 2021 jyly naýqastardyń 92%-na áleýmettik kómek kórsetildi», dedi M.Ádenov.
Sonymen qatar ol azamattardy aýrýdyń alǵashqy belgileri kezinde dereý medısınalyq kómekke júginýge shaqyrdy.
«Ýaqtyly anyqtaý jáne úzdiksiz emdeý kezinde týberkýlezdi tolyq emdeýge bolady. Týberkýlezben aýyrǵan adamdar basqalarǵa qaýip tóndirmeı, oqyp, jumys isteı alady, áıelder dúnıege deni saý bala ákele alady jáne tolyqqandy ómir súrýge múmkindik bar», dedi ol.
