Kóktem órnegi

Oqýshylardy ultjandylyqqa, ımandylyqqa tárbıeleý kez kelgen mekteptiń kúndelikti sharýasy bolǵanymen, naýryz meıramy qarsańynda bul ıgi isterdiń róli tipti artady. Atadan balaǵa mura etip qaldyrylǵan rýhanı qundylyqtardyń biri ári salt-dástúrimizdiń erekshe jańǵyratyn tusy Naýryz meıramy bolsa, onyń óz deńgeıinde toılanýyna bilim ordalary aıryqsha mán beredi. Bıyl Raıymbek batyr atyn­daǵy №50 mektep-lıseıde «Nur sebeler, Ulystyń uly kúni» merekelik keshi ótkizildi. Qala kóleminde ótken merekelik keshke Asta­na qalasy bilim basqar­masy­nan, Tilderdi damytý basqarmasynan, «Zerde» ınno­vasııalyq ortalyǵynan, son­daı-aq, Q.Qýanyshbaev atyn­daǵy qazaq drama teatrynan qo­na­qtar men ata-analar qaýy­my qatysty. Qazaq halqynyń salt-dástúrinen, ádet-ǵurpynan ha­bardar etetin besikke salý, selt etkizer, uıqy ashar, betashar, syrǵa salý, bata-tilek syndy túrli ıgi sharalardan tálimdi kórsetilimder kórermenderge nasıhattaldy. Osy keshte oqýshylardyń bir bóligi naýryz kójeniń quramy men ózindik ereksheligi týraly aıtsa, taǵy bir top oqýshylar ásemdik úshin ósiriletin, Qazaqstannyń «Qyzyl kitabyna» engen, sırek kezdesetin baǵaly ósimdik «Naýryz sheshek» ósimdigi jaıly áńgimelep berdi. Keshtiń bir ereksheligi, oqý­shylar arasynda «Naýryz-EKSPO-2017» ulttyq taǵamdar baıqa­ýynyń ótkizilýi edi. Baıqaýdyń maqsaty – qazaq halqynyń salt-dástúrin, ult­tyq taǵamdaryn kórsetý, nasıhattaý ári EKSPO-2017 is-sharasyna Qazaqstan qandaı ulttyq taǵamdaryn usyna alady degen saýalǵa jaýap tabý bolatyn. Munda ulttyq taǵamdardyń ústelderge qoıylý mánerine de, onyń da­ıyndalý tehnologııasyna da erekshe kóńil bólinip, ár taǵamnyń paıdasy týraly ult­tyq kıim kıgen oqýshylar túsinikteme berdi. Kelgen qonaqtarǵa toıbas­tar taratylyp, naýryz kóje usynyldy. Ata-analardyń ult­tyq kıim kıip, óner kórsetýi de oqýshylarǵa ulttyq , patrıottyq tárbıe berýde mańyzy zor boldy. «Egemen-aqparat».