«Qysqy Olımpıadadaǵy nátıje kóńil kónshitpeıdi. Tokıodaǵy saıysta tek qolamen shekteldik. Beıjińnen múlde júldesiz oralǵan ulttyq quramaǵa qoǵam renjýli. Kópshiliktiń syny oryndy dep oılaımyn. Eki Olımpıadadaǵy nátıjemiz sport salasynda qordalanǵan máselelerdiń bar ekenin kórsetip berdi», dedi Mádenıet jáne sport mınıstri Dáýren Abaev.
Mınıstr bul máseleni sheshý joly – júıeli jumys ekenin atap ótti. «Aldaǵy tórt jyldyń ishinde jaǵdaıdy ózgerte salý ońaı emes. Buǵan tańda ýaqyt kerek. Ol úshin barlyq deńgeıdegi sportshylardy daıyndaý júıesine sport seksııalarynan bastap Olımpııa oıyndaryn qalyptastyrýǵa deıingi keshendi ózgerister qajet. Búgingi kúni bizdiń aldymyzda turǵan úlken mindet – sportty damytý baǵdarlamasynyń bastamasyn ázirleý. Oǵan sport nysandarynyń qurylysynan bastap, jarys kúntizbeleri men oqý-jattyǵý jıyndaryn júıeleý, kásiptik jáne buqaralyq sportty qarjylandyrýdaǵy balansty ornatý, barlyq deńgeıdegi sport mektepterin kadrlarmen qamtamasyz etý. Tóreshilerdi, jattyqtyrýshylardy, sport dárigerlerin daıarlaý jáne osy sekildi atqarylar jumystar kóp. Ázirlengen damý josparyn el Prezıdentimen kelisip, ony júzege asyrýǵa kirisemiz. Qazaqstandyq sportshylardy daıyndaıtyn «Parıj-2024» jáne «Mılan-2026» arnaıy baǵdarlamalary da osy jobaǵa engiziledi. Bar jaýapkershilik pen júzege asyrý jumysyn mınıstrlik óz mindetine alýǵa daıyn», dedi D.Abaev.
Sondaı-aq mınıstr sportty damytý baǵdarlamasyn ázirleýdi sportshylardy daıarlaý júıesine táýelsiz keshendi tekserý jasaýdan bastaý kerek ekenin aıtty. Sonymen qatar ol ulttyq qurama sportshylaryna qajet qoljetimdi ınfraqurylym, bilikti jattyqtyrýshylar tapshylyǵy, az jalaqy alatyn sport tóreshileriniń máselelerine toqtaldy.
Jıyn barysynda vedomstvo basshysy bıatlon men shańǵy jarysyn damytý boıynsha pılottyq jobanyń bastalǵanyn jetkizdi.
Mınıstr sporttyq rezervti sapaly daıyndaý qajettigine de basa nazar aýdardy. 2022 jyldyń 1 sáýirinen bastap respýblıkalyq deńgeıde olımpıadalyq sport túrleri boıynsha ulttyq quramalardyń sportshylaryn daıyndaý fýnksııalaryn ádettegideı Ulttyq Olımpıada komıteti emes, Mádenıet jáne sport mınıstrligi janyndaǵy Sportty damytý jónindegi respýblıkalyq dıreksııasy júzege asyrady. Mınıstr jaýapty vıse-mınıstrge dıreksııa qyzmetiniń qysqa jáne orta merzimdi kezeńge arnalǵan jumys josparyn ázirleýdi tapsyrdy.
«Sizden suraıtynym, ulttyq quramalardyń daıyndyǵyn tııanaqty josparlaýǵa mán berińiz. Ulttyq Olımpıada komıtetiniń kúntizbelik josparyna qaıta-qaıta ózgertý men tolyqtyrýlar engizýdi toqtatatyn kez jetti. Osyndaı júıesiz josparlaýdyń kesirinen biz aqshanyń kóp bóligin sportshylardyń áýe bıletine jumsaımyz. О́ıtkeni tyǵyz alynady. Sondaı-aq dıreksııa ádisteme, kúntizbe, sportshylardyń oqý-jattyǵý barysy boıynsha josparlar men esepterdi qatań baqylaýǵa alýy kerek», dedi D.Abaev.
Ulttyq Olımpıada komıteti Sport dıreksııasynyń basshysy Elsııar Qanaǵatov XXIV Qysqy Olımpıadadaǵy qysqy sport túrleri boıynsha ulttyq qurama qorytyndysyn jarııalady. Ol Abzal Ájiǵalıevtiń, konkıshi Nadejda Morozovanyń jetistigin erekshe atap ótti.
«Olımpıadanyń nátıjesi bizge sáıkes kelmeıdi. Jastar alǵa umtylýy kerek. 30 jastaǵy sportshylardyń básekeles izbasarlary joqtyǵyn kórsetedi. Koronavırýs indeti Galyshevaǵa áser etti, Qalmyrzaevaǵa da karantınde shektelýge týra keldi. Konkımen júgirý sporty degende qazaqstandyq sportshylardan esimizge birinshi bolyp Denıs Kýzın túsetini jasyryn emes. Biraq Kýzın dúnıege kelgen Qostanaı qalasynda muzaıdyn kesheni joq, esesine fýtbol stadıony salynyp jatyr. Eger sizdiń óńirden osy sport túrinen álem chempıony shyqqan bolsa, nege jabyq muzaıdyn salmasqa?! Mınıstrlik basshylyǵynan osy máselelerge nazar aýdarýdy suraımyn. Short-trek qazirgi tańda frıstaıl mogýl, frıstaıl akrobatıka sekildi álemdik sporttyń elıtasy sanalady. Federasııalar sporttyń bul túrin baǵdarlamaǵa engizip, aımaq sportshylary jumyldyrylýy kerek. Sebebi álem tájirıbesinde sportqa, eń aldymen, federasııalar jaýapty. Biz sporttyq medısınaǵa kóńil bóle bastadyq, 3 oblysta ortalyqtar jabdyqtaldy. Ǵylym boıynsha – genetıkalyq zertteýler júrgize bastadyq», dedi E.Qanaǵatov.
Mogýl frıstaıldan bas jattyqtyrýshy Elena Krýglyhına qysqy sport túrlerinen joǵary sapaly ınfraqurylymy men 50 jyldan asa tıimdi basqarý ınstıtýttary qalyptasqan AQSh, Reseı, Norvegııa, Japonııa, Shvesııa basqa da elderdiń sportshylarymen salystyrǵanda qazaqstandyq sportshylardyń básekege qabiletti ekendigine nazar aýdardy.
«Bizge rezervtik keshender qajet. Oqýshy sabaqtan shyqqan soń jattyǵatyn oryn joq. Sondaı-aq sportshylarymyz qatysatyn saıystardy BAQ-ta tikeleı efırde kórsetý mańyzdy. Tóreshiler ádette Kanada nemese Fransııa sportshylarynyń upaıyn arttyryp jiberedi. О́ıtkeni olardy kórip, tamashalap otyrǵan alyp kúsh bar, ol – televızııalyq aýdıtorııa», dedi E.Krýglyhına.
Shańǵy jarysy boıynsha bas jattyqtyrýshy Aleksandr Batıaıkın respýblıka kóleminde buqaralyq sporttyq sharalardy ótkizý, óńirlerdegi balalar jattyqtyrýshylaryna jaǵdaı jasaý, onyń ishinde jalaqy kóterý, zamanaýı sporttyq qural-jabdyqtarmen qamtamasyz etip, ádistemeler ázirleý sekildi máselelerge toqtaldy. Sondaı-aq ol óz shákirtteriniń Olımpıadadaǵy tómen nátıjesi úshin keshirim surady.
Ulttyq shańǵy qaýymdastyǵynyń bas hatshysy Asqar Valıev shańǵynyń frıstaıl, tramplınnen sekirý, skandınavııalyq kombınasııa jáne taý shańǵysy boıynsha ulttyq quramalardyń nátıjelerine taldaý jasady.
«Bul sport túrleriniń damýy úshin 20, 40, 60 metrlik jattyǵý tramplınderi qajet. Elimizde taý shańǵysyn damytpaý – óte uıat dep sanaımyn. Frıstaıl-akrobatıka – óte áserli kórinis. Bizdiń sportshylar úsh qarǵyp sekirýge bardy. Bul – qoldaýdy qajet etetin perspektıvalyq kózqaras. Jalpy, jazǵy daıyndyqqa arnalǵan tramplın nusqasyn qarastyryp jatyrmyz», dedi A.Valıev.
Jıyn sońynda qysqy sport túrleri boıynsha RODO dırektory Muratbek Qypshaqbaev jıynǵa qatysýshylardy Shortandy qalasyndaǵy Ulttyq shańǵy ortalyǵymen tanystyrdy. Sondaı-aq olar Mádenıet jáne sport mınıstrliginiń tapsyrysy boıynsha rejısser Aldııar Baırakımov túsirgen «Paralımpıadashy» fılminiń aldyn ala kórsetilimine qatysty.
