Aqmola oblysynyń jastar-resýrstyq ortalyǵy janynda jastarǵa qyzmet kórsetý ortalyǵynyń (JQO) ashylý rásimi ótti. Ol jerde jastardy jumysqa ornalastyrý jáne jumyspen qamtýdyń memlekettik baǵdarlamalary, turǵyn úı satyp alý, zań, sondaı-aq volonterlik máseleleri boıynsha tegin keńes ala alady. Ortalyq jumysynyń negizgi maqsaty – jastarǵa jáne jastar uıymdarynyń qyzmetine aqparattyq-konsýltasııalyq kómek kórsetý.
Oblystyq jastar-resýrstyq ortalyǵy basshysy Mánsııa Esekeeva óz sózinde qalada jastardy qoldaý boıynsha qyzmet kórsetý ortalyǵy jumys isteý kerektigin atap ótti. Osy sebepti jastarǵa arnalǵan osyndaı ortalyq alǵash ret ashylyp otyr. Onda birneshe qyzmet túrleri kórsetiletin bolady. Mysaly, búginde «Otbasy banki» qoljetimdi turǵyn úı satyp alý máseleleri boıynsha konsýltasııalyq kómek kórsetedi, al jumyspen qamtý ortalyǵynyń qyzmetkerleri jastardy qoldanystaǵy jumysqa ornalastyrý jáne jumyspen qamtý memlekettik baǵdarlamalary boıynsha habardar etedi.
Atalǵan ortalyqtyń qyzmeti jóninde Aqmola oblysy ishki saıasat basqarmasy basshysynyń orynbasary Sabyrhan Kenjebaev baıandap, qala stýdentterine arnalǵan keńes berý alańy dál sol sátte iske qosyldy. «Biz, Joǵary qazaq gýmanıtarlyq-tehnıkalyq kolledjiniń stýdentteri, jastarǵa qyzmet kórsetý ortalyǵynyń ashylýyna keldik. Bolashaqta kómekke qaıda júginýge bolatynyn bilemiz. Qalamyzda osyndaı ortalyqtyń ashylýy qazirgi jastar úshin tamasha jańalyq dep esepteımin. Sebebi, olardyń árqaısysy jumysqa ornalasý, psıhologııalyq, sondaı-aq basqa da másele boıynsha ótinish bildire alady», dedi 3-kýrs stýdenti Gúlzada Qojamuratova.
Aıta ketý kerek, kez kelgen adam jumys kúnderi atalǵan jastarǵa qyzmet kórsetý ortalyǵyna júgine alady.
