Bul kúni biz ózekten teppeı, baýyryna tartyp, qanatymen sý sepken qarlyǵashtaı qamqorlyǵyna alǵany úshin Qazaq eline alǵys aıtamyz. Qıyn-qystaý ýaqytta bir tilim nanymen bólisip, súıeý bolǵan qazaǵymyzdyń jerinde sol dostyq, sol kelisim men sol beıbitshilik saqtalyp keledi. Qazaq jeri bizdiń – Otanymyz.
Elimizde turatyn barlyq etnostar bul aıtýly kúnniń mán-mańyzyn óte jaqsy biledi ári qurmetteıdi degen senimdemin. Ozbyr saıasattan zobalań kórip, japa shekken túrli etnostar qazaq otbasylarynan pana tapty, Qazaq eline osylaısha sińisip ketti.
Gertrýda Plataıstyń esteliginiń jelisimen jazylǵan «Qurt – asyl tas» oqıǵasyn barshamyz jaqsy bilemiz. Dárýmenge baı, ashyqqanǵa qorek, ash-jalańash bala-shaǵa men toryqqan áıelderge talshyq bolǵan qazaqtyń ulttyq taǵamy qurt – shynynda da qasıetti. Mereke qarsańynda Assambleıa jastary Qaraǵandyda qurt taratý sharasyn ótkizip, osy kúnniń mańyzyn túsindirdi.
Meıirimdilik, qonaqjaılylyq – osy kúnniń sımvolyna aınaldy. Men bul jarqyn kúnniń jańa maǵynaǵa toly bolǵanyna qýanyshtymyn. Jańa Qazaqstan – beıbitshilik pen jasampazdyq eli! Bizdiń jasampaz kúshterimiz eldegi beıbitshilik pen kelisimdi odan ári nyǵaıtýǵa, ıgi isterimizge baǵyttalǵan. Beıbit kúnniń batyrlaryna aınalǵan qutqarýshylarǵa, jas sarbazdarǵa, aq halatty abzal jandar – dárigerlerge alǵys retinde syı-qurmetimizdi kórsettik. Jaqsylyqty baǵalaı bilip, oǵan jaqsylyqpen jaýap qaıtarý ózara syılastyq pen qurmetke bastaıdy. Qundylyqtardyń qadirine jete alǵan eldiń keleshegi zor.
Osy oraıda «Vaınah» cheshen-ıngýsh etnomádenı birlestiginiń atalǵan mereke qarsańynda 2 mln teńgeni quraǵan qaıyrymdylyq is-sharasyn uıymdastyrǵanyn aıta ketkim keledi. Osylaısha, biz kópbalaly analarǵa, muqtaj otbasylarǵa qoldaý kórsettik. Álbette, ıgi ister kóp bolsyn! Týǵan jer – ol Ana! Ol bárimizdi óziniń jylýymen jáne nurymen ósirdi. Biz onyń rızashylyǵyna bólenip, Qazaqstan jerine beıbitshilik pen amandyq tileımiz!
Ývaıs DJANAEV,
Qaraǵandy oblystyq «Vaınah» cheshen-ıngýsh
etnomádenı birlestiginiń tóraǵasy
QARAǴANDY
