Qaraǵandy oblystyq Jastar saıasaty jónindegi basqarma basshysy Birjan Álimjanov atalǵan bottyń aı saıyn jańa aqparatpen tolyqtyrylyp otyratynyn aıtady.
– Jastar úshin aqparattyń negizgi kózi áleýmettik jeliler ekeni ras. Kóbinese olardyń qyzmeti jarııalanymdarmen jáne túsiniktemelerde hat almasýmen shekteledi. Jastarǵa túrli baǵyttar boıynsha aqparattyń qoljetimdiligin qamtamasyz etý úshin ótken jyldyń kókteminde bot quryldy. Onyń kóptegen múmkindigi bar. Olardyń qatarynda oblys boıynsha jastar resýrstyq ortalyqtarynyń baılanys derekterin usyný qyzmeti de bar, – deıdi ol.
JasProKrg botyn paıdalanýshylar bastapqy mázirden ózderin qyzyqtyrǵan bólimge ótip, tolyǵyraq aqparat ala alady. Qazirgi ýaqytta bot volonterlik qozǵalysqa qosylýǵa múmkindik beredi. Jastar ózderiniń erikti uıymyn tirkeı alady nemese burynnan bar uıymǵa qosyla alady.
Sonymen qatar osy jerde qandaı da bir is-sharany ótkizý úshin kovorkıng-ortalyqqa ótinim qaldyrýǵa da bolady.
Basqarmanyń barlyq iri jobalary týraly aqparat ta jalpyǵa ortaq usynylyp, onymen tanysý úshin yńǵaıly ornalastyrylǵan. Olardyń arasynda Qaraǵandy oblysy ákiminiń granttary da bar.
B.Álimjanov bottyń negizgi qyzmeti jumysqa ornalastyrý týraly bólim ekenin aıtady. «Jastar praktıkasy», «Dıplommen – aýylǵa!», «Alǵashqy jumys orny», «Jasyl el», «Qoǵamdyq jumystar» baǵdarlamalary jastarǵa ýaqytsha da, turaqty da jumys tabýǵa múmkindik beredi.
Bottyń basty artyqshylyǵy – ony paıdalaný ońaı, ári mobıldi jáne jumys ústeliniń barlyq platformasynda qoljetimdi.
Budan bólek Telegram-da JasProKrg_chat ta quryldy. Onda jastar ózderin tolǵandyrǵan suraqtardy qoıyp, mamandardyń tolyqqandy jaýabyn ala alady.
Qaraǵandy oblysy
