CARTO 3V7 Prime – naýqastyń júregindegi barlyq «kórinisterdi» ekranǵa shyǵaratyn óte aqyldy jabdyqtarmen toltyrylǵan shaǵyn tireý. Osy arqyly Reseıdegi Irgeli jáne translıasııalyq medısına federaldy zertteý ortalyǵynyń jetekshi mamany Sergeı Artemenko otandyq klınıkanyń arıtmologteri úshin sheberlik dárisin ótkizdi.
«Bıyl biz rentgenendovaskýlıarlyq operasııalyq blokty halyqaralyq sapa standarttaryna sáıkes jetildirdik. Júrek arıtmııasyn emdeý isinde «altyn standart» dep tanylǵan CARTO 3V7 Prime, ıaǵnı úsh ólshemdi júrekishilik navıgasııa júıesin ornattyq. Bul júıe júrek yrǵaǵy qatty buzylǵan naýqastardy tıimdi emdeýge jol ashady. Ol halyqaralyq tájirıbede júrekke jasalatyn túrli arıtmologııalyq operasııada sátti qoldanylady», deıdi KIAǴZI basqarma tóraǵasy, professor Roza Qýanyshbekova.
Emdeýdiń eń ınnovasııalyq ádisteriniń biri – radıojıilikti ablasııa (RJA). CARTO 3V7 Prime paıdalaný osyndaı prosedýranyń tıimdiligi men qaýipsizdigin qamtamasyz etedi. Osy erekshe qondyrǵy júrektiń tolyq úsh ólshemdi kartalaryn jasaý jáne keıde qaıǵyly jaǵdaılarǵa dýshar etetin arıtmııanyń kóptegen túrin emdeýge qabiletti.
Reseı kardıohırýrgi, Novosibir qalasynyń rentgenendovaskýlıarlyq dıagnostıka men irgeli jáne translıasııalyq medısınadaǵy FZO jetekshi mamandarynyń biri Sergeı Artemenkonyń aıtýynsha, osy ádis alynatyn parametrlerdiń dáldiginiń nátıjesinde prosedýrany tıimdi jáne jyldam etedi. 1 mm-ge deıingi dáldikpen 3D-tehnologııalary arıtmııa kózin – basqa qan tamyrlaryna zaqym keltirmeı patologııalyq oshaqty tabýǵa múmkindik beredi, pasıent tolyqtaı qalpyna keledi, tipti operasııa barysynda nátıje kórinedi.
CARTO 3V7 Prime operasııa jasaý júıesimen jaraqtandyrý – saýyǵyp shyqqan pasıentterdi kóbeıtip, júrek yrǵaǵynyń buzylýlaryn dıagnostıkalaýdyń dáldigin, kateter lokalızasııasy esebinen pasıentterdi emdeý men ádistemeniń tıimdiligin arttyryp, bir pasıentte qaıta qaraý qajettiligin azaıtyp, ınfarkt, júrek jetkiliksizdigi, ınsýlt sııaqty basqa da kenetten bolatyn ólim men asqynýlardyń sanyn azaıtýǵa múmkindik beredi.
Osylaısha, aqpannyń 16-19-y aralyǵynda sheberlik dárisi sheńberinde túrli jastaǵy júrektiń kúrdeli derti bar 30 shaqty pasıentke operasııa jasalady. Erekshe bir jaǵdaıdy aıta ketý kerek, júkti bolǵanyna 20 apta tolǵan 27 jastaǵy pasıentke operasııa jasaldy. Ol áli quryp, bas aınalýy, esinen taný, júrek jumysyndaǵy úzilister, qalypty dene qımyly kezinde de entigý, jalpy álsizdik, sharshaý sekildi belgilermen birge júretin júrek soǵysynyń jıilený ustamasyna shaǵymdanǵan. Pasıentke paroksızmaldy qarynshaústi tahıkardııa dıagnozy qoıyldy. Sınkope. Operasııa sátti ótti. Júkti kelinshektiń jaǵdaıy qazir jaqsy.
CARTO 3V7 Prime júrekishilik navıgasııanyń osy úshólshemdi júıesi Almaty qalasynda tek Kardıologııa jáne ishki aýrýlar ǴZI-da, al astanada – Ulttyq ǵylymı kardıohırýrgııa ortalyǵynda ornatylǵan.
ALMATY
