Oblystyq densaýlyq saqtaý basqarmasynyń basshysy Ashan Baıdýálıevtiń málimetine súıensek, 2020 jyldyń naýryzynan beri 62 195 adamnan COVID-19 ınfeksııasy anyqtalyp otyr. Sodan beri naýqastardyń 98,2%-y saýyǵyp shyqty. Sońǵy eki aptada koronavırýs ınfeksııasyn juqtyrý deregi 2,6 esege tómendedi. О́ńirde 24 aqpandaǵy derekke sáıkes qaýipti vırýsqa shaldyqqan 346 adam úı jaǵdaıynda, al 47 naýqas 2 360 oryndyq ınfeksııalyq stasıonarda, 106 tósektik orynǵa arnalǵan jansaqtaý bóliminde jaǵdaıy nasharlaǵan bes naýqas em qabyldaý úshin oqshaýlanǵan.
Máselen, Qurmanǵazy aýdanynda turatyn erli-zaıypty zeınetkerler Sáýirbaı Dáýitov pen Jemis Jantemirovanyń jasy – 74-te. Ekeýi de koronavırýs ınfeksııasyn juqtyrǵan. Olar 1 aqpanda jedel járdemmen Atyraýǵa jetkizilip, aýrýhanaǵa aýyr jaǵdaıda túsken.
– Bastapqyda naýqastardyń dene qyzýy kóterilip, tábeti tómendegen. Entikpe, tamaq, bas aýrýy 23 qańtardan bastap mazalaǵan. Alaıda aýrý belgileri 31 qańtarda kúsheıgen. Dárigerler naýqastardyń densaýlyǵyna jiti tekserý júrgizdi. Erli-zaıypty zeınetkerlerde koronavırýs ınfeksııasyna qarsy PTR zertteýi oń nátıje kórsetti. Er adamnyń ókpesiniń 17%-y, al áıelde 42%-y zaqymdanǵany belgili boldy, – dep málim etti №2 oblystyq aýrýhananyń baspasóz qyzmeti.
Jemis Jantemirovaǵa ekijaqty polısegmentarly pnevmonııa dıagnozy qoıylypty. Infeksııalyq stasıonardyń jansaqtaý bóliminde 9 kún em qabyldady. Jaǵdaıy jaqsarǵannan keıin úıine shyǵarylǵan.
– Aýrýhanaǵa túsken sáttegi jaǵdaıymdy aıtyp jet-
kize almaımyn. Dem alý qıynǵa tústi. Bas aýrýy mazalap, dene qyzýym 38 gradýsqa deıin kóterildi. Aq halatty abzal jandardyń jyly sózi men hattamaǵa sáıkes júrgizgen eminiń arqasynda jaǵdaıym jaqsardy. Álemdi qaýipti indet sharpyǵan qıyn sátte №2 oblystyq aýrýhananyń dárigerleri men medbıkeleri, basqa da qyzmetkerleri esh moıymaı, ajaldan arashalap qaldy. «Saýyǵyp shyǵasyz, áje!» dep demeý bolǵan meıirimdi jandarǵa alǵystan basqa aıtarym joq, – deıdi Jemis Jantemirova.
Dárigerler jaqynyńa janashyr bolýdyń, qaýipti vırýsty tejeýdiń bir ǵana jolyn usynady. Bul – vaksına saldyrý. Biraq vaksına saldyrý áli de baıaý ekeni baıqalyp otyr. Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, byltyrǵy 1 aqpannan beri vaksınalardyń birinshi komponentin 268 149 adam ektirgen. Vaksınalardyń ekinshi komponentin saldyrǵan atyraýlyqtardyń sany 253 252 adamǵa jetken.
Sondaı-aq 20 qarashadan beri Pfizer ekpesin saldyrý jalǵasyp jatyr. Bul vaksınany alatyn 12 men 18 jas aralyǵyndaǵy balalar sany 63 138 adamdy quraıdy. Bala emizetin jáne júkti áıelder sany – 35 362. Osy kezge deıin Pfizer ekpesin osy sanatqa kiretin 6 900 adam saldyrǵan.
Byltyrǵy 23 qarashada bastalǵan revaksınalaýdan ótetinder tizimine 97 493 atyraýlyq engizilgen. Revaksınalaýdy birinshi kezekte dárigerler men polıseıler, muǵalimder, quqyq qorǵaý organdary men arnaıy mekemelerdiń qyzmetkerleri, memlekettik qyzmetshiler, sondaı-aq stýdentter men sozylmaly syrqatpen esepte turǵan pasıentter alady. Qazir atalǵan sanattardaǵy 38 756 adam qaıta vaksınalaýdan ótkeni belgili bolyp otyr.
Atyraý oblysy
