«Qazir búkil álemdegi ahýal ózgerip jatyr. Jańa qundylyqtarmen qatar kúrdeli syn-qaterler paıda bolýda. Osyndaı aýmaly-tókpeli ýaqytta elimiz damýdyń kelesi kezeńine qadam basty. Biz «Jańa Qazaqstandy» qurýǵa kiristik. Bul – óte aýqymdy mindet. Tipti bolashaqtaǵy taǵdyrymyzdy sheshetin asa mańyzdy jumys deýge bolady», degen Qasym-Jomart Toqaevtyń sózi – bárimizge naqty baǵdar. Prezıdent eldegi jetekshi saıası uıymdy jańǵyrtý týraly aıtqanda qazaqtyń «uıytqy» degen ádemi sózin qoldandy. Shyn máninde barlyq is-áreketke uıytqy bolar kúsh kerek. Jańadan velosıped oılap tabýdyń qajeti shamaly. Qoldaǵy bardy uqsatý qajet.
О́zgeristi eń aldymen ózimizden bastaıyq degen Prezıdent partııanyń aty zatyna saı bolsyn degen tilek bildirdi. Májilis Tóraǵasy Erlan Qoshanov saıası uıymnyń ataýyn «Amanat» dep ózgertýdi usyndy. «Amanat» degen sóz qazaq úshin qasıetti.
«Egemendigimiz, eldigimiz ben birligimiz, keń-baıtaq jerimiz – bizge babalardan jetken amanat. Osy qasterli qundylyqtarymyzdy kózdiń qarashyǵyndaı saqtap, bolashaqqa mıras etýimiz kerek. Memlekettilik dástúr jalǵastyǵy, urpaq sabaqtastyǵy degenimiz, mine, osy. Halqymyz eshqashan amanatqa qııanat jasamaǵan», dep Qasym-Jomart Kemeluly atalǵan usynysty qoldady.
Partııanyń ataýy ózgerdi. Endi onyń qurylymy da, sapalyq ólshemi de ózgerýi tıis. Mańdaıshany aýystyrǵannan eshkimniń mańdaıy jarqyraı qoımaıdy. Mazmundy is-áreket, partııalyq apparattyń ýaqytqa ıkemdelýi, «janarynda oty bar» jandardyń jarqyrap shyǵýy, elmen etene jumys isteý amaldaryn tabý kerek-aq. Eń bastysy, halyqtyń senimine ıe bolý mindeti alda tur. Bul úshin Májilis pen máslıhattardaǵy partııa fraksııalary naqty sheshimder qabyldaýǵa kóshýi qajet. Partııa jas saıasatkerlerdi shyńdaıtyn, suryptaıtyn uıymǵa aınalýy kerek.
Qazir áleýmettik jelide jelpine sóılep, máseleniń kóbin jadaǵaı talqylaý kóp. Prezıdent jurtty alańda nemese jelide jelkildegennen góri, Parlament pen máslıhat jıyndarynda syndarly jumys isteýge shaqyrdy. Sóıtip, saıası mádenıetti qalyptastyrýdyń jolyn kórsetti.
Jón sózge toqtaǵan jurtpyz. Ulaǵatty tárbıe kórgen ultpyz. Bir nárseni anyq uǵynǵan abzal. Bizge qýatty da ál-aýqatty Qazaqstandy eshkim quryp bermeıdi. Bárin ózimiz isteýimiz qajet. Osyny qaperde ustaıyqshy.
Nurtóre JÚSIP,
Senat depýtaty
