Azamattardyń konstıtýsııalyq quqyqtary qorǵalady

Jıynǵa Bas prokýror­dyń min­detin atqarýshy Berik Asylov, Adam quqyqtary jónin­degi ýákil Elvıra Ázimova men Respýblıkalyq advokat­tar al­qasy tóraǵasynyń orynbasary Igor Vranchev, sondaı-aq quqyq qorǵaý jáne arnaıy organ­dardyń basshylary qatysty.

B.Asylov Memleket bas­shy­synyń tapsyrmasy boıynsha qaıǵyly oqıǵanyń sebep­teri muqııat tergep-tekserilip jatqanyn atap ótti. «Qazir biz beıbit mıtıngilerdi ártúrli kúshterdiń paıdalanǵanyn naqty bilemiz. Uıymdastyrýshylar destrýktıvti jáne qylmys­tyq toptardy tartyp, qarýlandy­ryp, olardyń áreketterin úıles­tirgen. Tártipsizdikter azamat­tarǵa qarsy zorlyq-zomby­lyqpen, qıratýmen jáne tonaý­men qatar júrgen. Olardyń maqsaty halyqty qorqytyp, bıliktiń jumysyna tosqaýyl qoıý bolǵan», dedi ol.

Bas prokýratýranyń Qyl­mys­tyq qýdalaý qyzmetiniń bastyǵy Serik Shalabaev óz kezeginde: «Jappaı tártip­sizdikter kezinde jáne odan keıin ustalǵan tulǵalardyń qu­qyq­tarynyń saqtalýyn Bas pro­kýratýra erekshe baqylaý­da. Búginde azaptaý jáne qyzmet­tik ókilettikti asyra paıdalaný boıynsha 203 qylmystyq is qozǵalǵan, olardyń ishindegi eń rezonanstylaryn arnaıy prokýrorlar tergeýde. Sotqa deıingi tergep-tekserý barysynda ustalǵandarǵa qatysty zańsyz tergeý ádisterin qoldandy degen kúdikpen 9 qyzmetker anyq­talyp, ustaldy», dedi. S.Shala­baevtyń aıtýynsha, jedel-tergeý toptary terrorızm aktileri, kisi óltirý, qarý urlaý jáne jappaı tártipsizdikter boıynsha 3 502 qylmystyq isti tergeýde. 737 kúdikti tergeý ızolıatorynda qamaýda.

Sondaı-aq ol bultartpaý sharasyn ózgertýmen 307 adam, onyń ishinde kámeletke tolmaǵan 27 adam bosatylǵanyn, odan basqa kámeletke tolmaǵan 2 adam qamaýda qalǵany týraly aıtty. Búginde bultartpaý sharasyn ózgertý týraly arnaıy prokýrorlardan taǵy 22 adamǵa qatysty materıaldar túsken. «Qańtar oqıǵasyna qatys­ty ister boıynsha 1,5 myń­ǵa jýyq oqıǵa oryndaryn qaraý júrgizildi, 1 500-den astam sot-medısınalyq sarap­tamalar taǵaıyndalyp, júr­gizilýde. Prokýratýra organdaryna tergeýdiń zańsyz ádisteri men azaptaýdy qoldaný týraly 283 aryz tústi. Oǵan kináli quqyq qorǵaý organdarynyń qyzmetkerleri zań aldynda qatań jaýapqa tartylady», dedi S.Shalabaev.

Qadaǵalaý organy barlyq jaǵdaıda daýsyz dálelderge negizdelgen obektıvti jáne beıtarap baǵa berilip, azamattardyń konstıtýsııalyq quqyqtarynyń qolsuǵylmaýshylyǵy qamtama­syz etiletinine sendirdi. Proký­ror­lar tergeý ızolıatorlary men basqa da qyzmettik úı-jaılardy kún saıyn, onyń ishinde túngi ýaqytta jáne demalys kúnderi tekserýdi jalǵastyrady.

Bul jumys Ulttyq aldyn alý tetiginiń qatysýshylarymen jáne quqyq qorǵaýshylarmen tyǵyz baılanysta júrgiziledi.