Respýblıkalyq «Lenın-Kýrchatov» tas jolynda júıtkip, Kóktóbe aýylynyń tusynan óte bergende kóligim joldan ushyp ketti. Qudaı saqtady. Eshqandaı jaraqat almadym. Kóligime de zaqym kelmedi. Jalǵyz bolǵanyma ishteı qýandym. «Jaman aıtpaı jaqsy joq» demekshi, jolaýshylarmen kele jatyp úlken apatqa ushyrasam... Osy mándegi túrli oılar maza bermedi. Qarańǵy qapasta aqyldasatyn eshkimniń bolmaýy da sanamdy san-saqqa júgirtti. Biraz ýaqyttan soń esimdi jınap, 102 nómirine habarlastym. Oqıǵa ornyna áp-sátte 2 patrýldik kólik toqtaı qaldy. Maı aýdanynyń polısııa qyzmetkerleri Nurlan Áýbákirov, Mırhat Mýrzalınov, Bahtııar Nyǵmet jáne Almaz Rahmetov alǵashqy medısınalyq kómek kórsetip, symarqan arqyly joldan shyqqan kóligimdi tartyp aldy.
Mundaı jaǵdaıǵa alǵash ret tap bolyp otyrmyn. «Perishte qaqty» degen osy shyǵar. Uzaq ýaqyt eseńgirep júrdim. Negizi kólik jyldamdyǵyn arttyrmaı, jol erejelerine muqııat qaraıtyn júrgizýshilerdiń biri edim. Bul joly jańa jyldyq kóńil kúımen jaqyndaryma asyǵyp, rýlge ıe bola almaı qaldym. Úlken sabaq aldym. Oqıǵa ornyna tez jetken polısııa qyzmetkerlerine rahmetimdi aıtamyn. Saqshylar jan-jaqty eken. Dárigerdiń de, psıhologtyń da qyzmetin atqaryp, barynsha qolushyn sozdy. «Janar-jaǵarmaıyń jete me?» dep suraǵannyń ózi polısııa qyzmetkerleriniń adamgershiligi mol ekenin ańǵartqandaı. О́z mamandyǵynyń maıtalmany degen osyndaıda aıtylsa kerek. Turǵyndardyń amandyǵy úshin kúni-túni bir tynbaı, demalys kúnderi de shapqylap júretin azamattar kez kelgen marapatqa laıyq. Tártip saqshylarynyń jumysyna tabys, otbasylaryna amandyq tileımin!
Nursultan ERNAZAROV
Pavlodar oblysy
