Elimizde 1 naýryz – «Alǵys aıtý kúni» bolyp 2016 jyldan bastap atap ótilýde. Men de osy kúnniń qarsańynda ótkenge oı jiberip, jeke azamat retinde ózimniń alǵysymdy úshke bólip aıtqym keledi.
Eń aldymen, bıylǵy qańtar aıynyń basy halqymyzǵa qıyn boldy. El basyna qater tóndirgen syndarly sátte, el táýelsizdigi synǵa túsken shaqta tabandylyq tanytqan, turaqtylyqty saqtap qalǵan Memleket basshysy Qasym-Jomart Toqaevqa alǵys aıtqym keledi. Biz bul kúnderdiń qanshalyqty kúrdeli bolǵanyn áli túsinbeýimiz múmkin. Soǵan qaramastan, qańtardyń qandy jarasy jazylyp keledi, el turmysy qalypty yrǵaǵyna tústi. Álemdegi, jaqyn kórshililerimizdegi sońǵy oqıǵalardy kóre otyryp, el tynyshtyǵy eń basty baılyq ekenine kózimiz jete tústi.
Ekinshiden, men ózimdi dúnıege ákelgen, tárbıe bergen, bilim bergen ata-anama alǵys aıtamyn. Olar bizdi – qaryndasym ekeýmizdi qatarymyzdan qaldyrmaý úshin birneshe qyzmetti qosa atqaryp, tynymsyz eńbek etti. Men joǵary zańgerlik bilim aldym, qaryndasym úsh mamandyqty ıgerdi. Meniń tárbıeme ózimniń ájem, ataqty partızan qazaq qyzy Nurǵanym Baıseıitova erekshe áser etkenin aıta keteıin. Kishkentaıymnan ájem meni meıirimdilikke, tabandylyqqa, ımandylyqqa tárbıeledi. Olarǵa alǵysym sheksiz!
Úshinshiden, halqyma rahmet! Bul – qur pafos sóz emes. Sońǵy alty jyl ishinde qaıyrymdylyqpen, eriktilik isimen turaqty shuǵyldanyp kelemiz. Biz atqarǵan ıgilikti ister Batys Qazaqstan oblysynyń ishinde ǵana emes, búkil Qazaqstanǵa belgili. Qandaı da bir másele kóterip, muqtaj jandarǵa aksııa jarııalaǵan kezde halyq jan-jaqtan qaýmalap, kómek qolyn soza ketedi. Kúni keshe ǵana Terekti aýdanyna qarasty Podstepnoe aýylynda bir otbasyna, apamyzǵa kómektestik. Ol úıde aýyz sý bolmaǵan edi. Osy jaǵdaı jarııalanǵan sátte qaıyrymdy jandardyń biri turba berdi, biri tehnıkamen kómektesti. Sóıtip, apaıdyń aýlasynan qudyq qazyp berdik. Jınalǵan artyq aqshaǵa qoljýǵysh, azyq-túlik, dári-dármek sekildi kerek-jaraǵyn aldyq. Bir kásipker ol úıdiń kilemin tegin jýyp berdi.
Jaqynda, 22 aqpanda vaınah halqynyń deportasııasy kúnine oraı Oral qalasynda turatyn sheshen halqynyń ókilderi 40 otbasyna azyq-túlik kómegin kórsetti. Biz oblystyq meshitpen birlesip, az qamtylǵan otbasylaryna úlestirdik.
Aıta keteıik, mundaı qaıyrymdylyq isterine memlekettik qurylymdar únemi kómektesedi. Bizdiń jumysymyz árdaıym kóppen bitetin ister ǵoı. Qandaı bastama bolmasyn, memlekettik qurylymdar, ákimdikter únemi járdem beredi, aldymyzdan shyǵady. Mysaly, jaqynda az qamtylǵan bir otbasyna sý qubyryn jetkizýge Batys sý arnasy mekemesi kómektesti. Mundaı myńdaǵan mysaldy aıtyp bere alamyn.
Jetimdi jylatpaý, muqtajǵa kómektesý – adamzat balasynyń barlyǵyna ortaq asyl qasıet. Izgi ister de, shynaıy alǵys ta jomart júrekten shyǵady, jyly júrekten taralady. О́zgeniń qasiretin óz júreginen ótkizetin jandar aınalamyzda kóp bolsyn! Qasıetti Qazaqstanymyz, ortaq Otanymyz aman bolsyn!
Talǵat ChÝDOBAEV,
Batys Qazaqstan oblystyq QHA eriktiler ortalyǵynyń jetekshisi
Batys Qazaqstan oblysy
