«Qazirgi kezeńdegi azamattyq joǵary oqý oryndaryndaǵy áskerı daıyndyq» dep atalatyn halyqaralyq jıynǵa ýnıversıtet rektory Erlan Sydyqov, Qorǵanys mınıstriniń orynbasary, general-maıor Muhamedjan Talasov, zapastaǵy general-leıtenant, Ulttyq qorǵanys ýnıversıteti Bas shtaby akademııasy fakýltetiniń basshysy Abaı Tasbolatov, «Zastava tarlandary» qoǵamdyq birlestiginiń tóraǵasy, zapastaǵy general-maıor Tursyn Ýajanov, «QR Qorǵanys mınıstrligi Áskerı-tehnıkalyq mektep» RMKM bas dırektory, zapastaǵy general-leıtenant Bolat Dárbekov, Qorǵanys mınıstrligi Áskerı bilim jáne ǵylym departamentiniń basshysy, polkovnık Talǵat Qalıshev bastaǵan bir top áskerıler jáne oqytýshy quram men stýdentter qatysty. Sondaı-aq konferensııada Reseı jáne Belarýs elderinen onlaın rejimde qosylǵan áskerı sarapshylar sóz alyp, áskerı kafedralardyń zapastaǵy ofıserler tapshylyǵyn toltyrýdaǵy rólin atap ótti. Ǵylymı-tájirıbelik konferensııanyń basty maqsaty – áskerı daıyndyqty damytýǵa baılanysty pedagogıkalyq máselelerdi ashyq talqyǵa salý, áskerı kafedralarda qatardaǵy jaýyngerlerdi daıyndaý baǵdarlamasyn túzý, oqý-ádistemelik jumysyn uıymdastyrý, stýdent jastardy áskerı ǵylymǵa tartý, áskerı mamandyqtardy salalandyrý, paıdaly yqpaldastyq, naqty usynystar daıyndaý. Basqosý barysynda osy saladaǵy kásibı mamandar JOO-daǵy áskerı daıyndyqty jetildirý máselelerine qatysty pikirlerin ortaǵa saldy.
Áskerı kafedranyń 20 jyldyǵyna arnalǵan ǵylymı konferensııanyń mańyzdylyǵyn atap ótken E.Sydyqov bul basqosýdyń Jańa Qazaqstannyń damýyna ózindik áseri bolaryn da alǵa tartty. «Bul rette keshegi qańtar qasiretin de esten shyǵarmaýymyz qajet. Otanshyldyq pen jaýapkershiliktiń birligi el tutastyǵyna bastaıdy. Sońǵy kezde qoǵamda «JOO-da áskerı kafedra qajet pe degen?» suraq jıi qoıylyp júr. Mundaı suraqtarǵa tushymdy jaýap berý úshin ǵylymı turǵydan taldaý jasap, tájirıbeden tekserilgen usynystardy daıyndaýymyz qajet», degen ýnıversıtet basshysy elimizdiń qaýipsizdigi, onyń áskerı áleýetine qatysty asyǵys sheshim qabyldaýǵa bolmaıtynyn da eske salyp ótti.
EUÝ áskerı kafedrasynyń basshysy, zapastaǵy general-maıor Edil Orazov táýelsiz Qazaqstannyń Qarýly Kúshterin qurýdyń eń qıyn kezeńinde áskerı kafedralardyń qajettiligi týraly túrli pikirlerge qaramastan azamattyq joǵary oqý oryndary janyndaǵy áskerı kafedralardy saqtap qala alǵanyn atap ótti. «Búginde áskerı kafedralar janyndaǵy zapastaǵy ofıserler men serjanttar áskerı daıarlyǵyn is júzinde dáleldep berdi. Bul quram memlekettiń jumyldyrý áleýetin qalyptastyrýdyń mańyzdy kózi bolyp sanalady. Ekonomıkalyq turǵydan alǵanda da bul eń qolaıly jol», dedi general-maıor.
Konferensııaǵa qatysýshylar is-shara barysynda azamattyq joǵary oqý oryndarynyń stýdentterine áskerı daıyndyq pánderin oqytý ádistemesi jáne azamattyq joǵary oqý oryndarynda áskerı daıarlyqty uıymdastyrýdyń zamanaýı úrdisteri men erekshelikteri týraly pikir almasty.
